Azərbaycan, Bakı, 04 noyabr / Trend , müxbir İ.Əlizadə / Azərbaycan prezidentliyinə keçmiş namizədlərdən üç nəfəri son maliyyə hesabatlarını Mərkəzi Seçki Komissiyasına təqdim edib.
"Son hesablamalara görə, seçki kampaniyasına 30 min 800 manat maliyyə vəsaiti xərcləmişik", - çərşənbə axşamı Trend - a müxalifəti təmsil edən Böyük Quruluş Partiyasının sədri, prezidentliyə keçmiş namizəd Fazil Qəzənfəroğlu bildirib.
Trend - un arayışı: Oktyabrın 15 - də Azərbaycanda prezident seçkisi keçirilib. Prezident seçkisində yeddi namizəd - Yeni Azərbaycan Partiyasının (YAP) sədri, indiki dövlət başçısı İlham Əliyev, müxalif Ümid Pariyasının sədri İqbal Ağazadə, Böyük Quruluş Partiyasının sədri Fazil Qəzənfəroğlu , Bütöv Azərbaycan Xalq Cəbhəsi Partiyasının sədri Qüdrət Həsənquliyev, Müasir Müsavat Partiyasının sədri Hafiz Hacıyev, Azərbaycan Liberal Demokrat Partiyasının sədri Fuad Əliyev və müstəqil namizəd Qulamhüseyn Əlibəyli iştirak edib.
Seçkilərin nəticələrinə əsasən, İlham Əliyev hamıdan çox səs toplayıb - 88.73 faiz.
İqbal Ağazadə 2, 86 faiz, Fazil Qəzənfəroğlu 2,4 faiz, Qüdrət Həsənquliyev 2,28 faiz, Qulamhüseyn Əlibəyli 2,23 faiz, Fuad Əliyev 0,78 faiz, Hafiz Hacıyev 0,65 faiz səs toplayıb.
Seçki Məcləsinə əsasən, prezidentliyə keçmiş namizədlər rəsmi nəticələr açıqlandıqdan sonra, on gün müddətində maliyyə hesabatlarını MSK-ya təqdim etməlidirlər.
Müxalifəti təmsil edən Azərbaycan Liberal Demokrat Partiyasının sədri, prezidentliyə keçmiş namizəd Fuad Əliyev Trend - a bildirib ki, maliyyə hesabatını MSK-ya təqdim edib. "Seçki kampaniyasına 67 min manat vəsait xərcləmişik", - deyə o, əlavə edib.
Müxalifəti təmsil edən Ümid Partiyasının sədri, prezdentliyə keçmiş namizəd İqbal Ağazadə də yekun maliyyə hesabatını MSK-ya təqdim edib. Ağazadə bildirib ki, seçki kampaniyasına 220 min manatdan artıq vəsait xərcləyib.
Öz təşəbbüsü ilə seçkiyə qatılan müstəqil namizəd Qulamhüseyn Əlibəyli bildirib ki, bu həftə maliyyə hesabatını MSK-ya təqdim edəcək.
"Hesabatın təqdim olunması ilə bağlı qanunvericilikdə boşluq var. MSK-da da bilmirlər ki, hesabat nə vaxt təqdim olunmalıdır", - deyə o əlavə edib.
Hakim Yeni Azərbaycan Partiyası və müxalifəti təmsil edən Bütöv Azərbaycan Xalq Cəbhəsi Partiyasının sədri, prezidentliyə keçmiş namizəd Qüdrət Həsənquliyev bir neçə gün əvvəl maliyyə hesabatını MSK-ya təqdim ediblər.
Müasir Müsavat Partiyasının sədri, müxalifətdən prezidentliyə keçmiş namizəd Hafiz Hacıyev MSK-ya maliyyə hesabatı verməkdən imtina edib.
Məqalə müəllifi ilə əlaqə ünvanı: [email protected]
