Azərbaycan, Bakı, 14 noyabr/ Trend , müxbir A.Hüseynbala/ Müxalifətin Əməkdaşlıq Mərkəzinə daxil olan partiyaların iştirakı ilə müxalifət partiyalarının daha geniş tərkibdə əməkdaşlığına nail olunmasa, digər blok yarana bilər.
"Müxalifəti Əməkdaşlıq Mərkəzinə daxil olan və digər siyasi təşkilatların birliyi yaranmasa, başqa bir qurumun yaranması təşəbbüsü gündəmə gələ bilər", - cümə günü Trend - a Müxalifətin Əməkdaşlıq Mərkəzinə (MƏM) daxil olan "Azərbaycan Naminə" İctimai Forumun (ANİF) prezidenti Eldar Namazov bildirib.
Trend - un arayışı: Müxalifətin Əməkdaşlıq Mərkəzinə "Azadlıq" bloku (Azərbaycan Xalq Cəbhəsi, Liberal, Vətəndaş və İnkişaf partiyaları), Müsavat Partiyası və "Azərbaycan Naminə" İctimai Forum (ANİF) daxildir. Sentyabrın əvvəlində bu siyasi təşkilatlar oktyabrın 15 - də keçirilən prezident seçkisini qanunsuz tanımaq barədə birgə bəyanat imzalayıblar. Bəyanatda prezident seçkisindən sonra formalaşacaq hakimiyyət qeyri - legitim elan edilib.
Seçkidən sonra müxalifətin daha geniş koalisiyada birləşməsi istiqamətində danışıqlar başlasa da, qarşılıqlı ittihamlar nəticəsində, hələ ki müxalifətin geniş koalisiyasının yaranması baş tutmur.
Onun sözlərinə görə, əməkdaşlıqla bağlı müxalifət partyalarının liderləri ilə ikitərəfli məsləhətləşmələr aparılır.
"Biz əvvəlcə Müxalifətin Əməkdaşlıq Mərkəzində ümumi prinsiplərlə bağlı sənədi müzakirə edib razılaşdırmalı, sonra digər siyasi hərəkatlarla danışıqlar aparmalıyıq", - Namazov vurğulayıb.
ANİF prezidenti MƏM - ə daxil olan qüvvələrin sayının artacağını istisna etmir. "Təbii ki, burada kəmiyyət yox, keyfiyyət əsas götürülməlidir. Koalisiyaya qoşulanların sayı az ola bilər, ancaq hamı səmimi əməkdaşlıq edərək, vahid mövqedən çıxış etməlidir. Ona görə, fikir ayrılığı olduğunu düşünmürəm. Sadəcə olaraq, mövqelərin üst - üstə düşməsi prosesi daha sürətlə getməlidir", - Namazov deyib.
Namazov MƏM - ə daxil olan bəzi partiya funksionerlərinin əməkdaşlıq edəcək müxaliftəin sərhədlərinin müəyyənləşdirilməsi ilə bağlı təkliflərini dəstəkləmir. "Mən bilərəkdən real müxalifət hesab etdiyim partiyaların adlarını çəkmirəm. Xoşuma gəlməyən ən əsas məsələ müxaliftəin sərhədlərinin müəyyənləşdirilməsidir. Hər üç - dörd ildən bir deyirlər ki, müxalifətin sərhədlərini müəyyənləşdiririk. Bu zaman birinin başqasından xoşu gəlməməsi, digərinin kiminsə haqqında nə zamansa mənfi fikir söyləməsi əsas götürülür. Bunlar hamısı real birliyin baş tutmaması üçün bəhanədir. " - ANİF rəhbəri söyləyib.
Məqalə müəllifi ilə əlaqə ünvanı: [email protected]