Azərbaycan, Bakı, 17 noyabr / Trend , müxbir C.Babayeva/ Gürcüstan Azərbaycanlıları Milli Assambleyası (GAMA) ölkənin müdafiə nazirinin istefasını tələb edir.
"Gürcüstan və Ermənistan müdafiə nazirlikləri arasında yeni əməkdaşlıq təşəbbüsü bölgədə hərbi münaqişələrin daha da gərginləşdirilməsinə yönəlib. Bu addım Gürcüstan-Azərbaycan və Gürcüstan-Türkiyə strateji müttəfiqlik prinsiplərinə ziddir", - deyə bazar ertəsi Trend -a GAMA rəhbəri Daşqın Gülməmədov bildirib.
Trend -un arayışı: Noyabrın 12-də Gürcüstanın müdafiə naziri David Kezaraşvili ilə bu ölkədə səfərdə olan Ermənistanın müdafiə naziri Seyran Ohanyanın görüşü keçirilib. Görüşdə Gürcüstan və Ermənistan arasında müdafiə sahəsində əməkdaşlığın dərinləşməsi və hərbi və hərbi-texniki sahədə əməkdaşlığın gücləndirilməsi müzakirə olunub. Danışıqlarda müdafiə sahəsində intensiv əməkdaşlıq etmək üçün yaxşı imkanların olduğu vurğulanıb.
Görüşdə həmçinin Ermənistanın Gürcüstan ərazisindən tranzit kimi istifadəsi barədə fikir mübadiləsi aparılıb və razılaşma əldə olunub. Hələlik rəsmi təsdiqini tapmayan məlumatlara görə, görüşdə tərəflər arasında Ermənistan ordusuna məxsus zirehli texnikanın Gürcüstanın tank təmiri zavodunda təmir etdirilməsi perspektivlərinə dair razılaşma əldə edilib.
Gülməmmədovun sözlərinə görə, Gürcüstan Müdafiə Nazirliyinin balansında olan Tbilisi tanktəmiri zavodunda Ermənistana məxsus tankların modernləşdirilməsi və təmiri ilə bağlı razılaşma birbaşa Azərbaycana qarşı yönəlib.
"Ermənistan tərəfi təmir etdirəcəyi tankları, hərbi maşınları aydın məsələdir ki, Azərbaycana qarşı istifadə edəcək. Əvvəllər də Ermənistanın hərbi texnikası həmin zavodda təmir olunurdu. Gürcüstanın müdafiə naziri mövcud əməkdaşlıq istiqamətlərini rəsmiləşdirmək istəyir", - deyə o bildirib.
Gülməmmədov Gürcüstan müdafiə nazirinin Ermənistanla hərbi əməkdaşlıq təşəbbüsünün anlaşılan olmadığını bildirib. "Azərbaycanla hərbi sahədə strateji əməkdaşlığı olan Gürcüstanın müdafiə nazirliyi Azərbaycanın əleyhinə addım atır. Belə addım bölgədə münaqişələrin alovlanması və hərbi əməliyyatalrın başlanmasına stimul verə bilər", - deyə GAMA rəhbəri bildirib.
GAMA rəhbəri deyib ki, Gürcüstan və Ermənistan müdafiə nazirlikləri arasındakı əməkdaşlıq Gürcüstan azərbaycanlıları, bəzi siyasi və dövlət qurumları arasında etirazlara səbəb olub. "Gürcüstan Azərbaycanlıları Milli Assambleyasının ölkənin müdafiə nazirinin istefası tələbi yerinə yetirilməsə, Assambleya ölkə prezidentinin administrasiyası və Müdafiə Nazirliyi qarşısında etiraz aksiyaları keçirəcək", - deyə Gülməmmədov bildirib.
Trend -un arayışı: Gürcütan Azərbaycanlıları Milli Assambleyası (GAMA) 2001-ci ildə yaradılıb. GAMA Gürcüstan iqtidarına qarşı müxalifət mövqeyində duran ictimai-siyasi təşkilatdır.
Məqalə müəllifi ilə əlaqə saxlamaq üçün ünvan: [email protected]