Belçika, Brüssel, 17 noyabr / Trend , müxbir E.Hüseynov/ Beynəlxalq ictimaiyyət Avropanın bir hissəsi sayılan Qafqazda Rusiyanın hərbi güc tətbiqini və Kremlin regionda mövcud sərhədləri dəyişdirmək cəhdlərini təqdir edə bəlməz, - ABŞ - ın NATO yanındakı səfiri Kurt Volker hesab edir.
"Avropada sərhədləri dəyişmək üçün Rusiyanın hərbi güc tətbiqini heç bir Avropa ölkəsi təqdir edə bilməz. Bu, Helsinki Məhkəməsinin və Paris Xartiyasının bu gün Avropada stabilliyin və təhlükəsizliyin düzənini müəyyən edən prinsiplərinə ziddir", - ABŞ - ın NATO yanında daimi nümayəndəsi Volker Trend müxbirinin sualına cavab verərkən deyib.
Diplomat əmindir ki, Rusiyanın Qafqazda sərhədləri dəyişdirmək üçün Gürcüstanda güc tətbiq etməsi ümumilikdə Avropa üçün mühüm əhəmiyyət daşıyır.
Amerikaların yanaşmasına görə, Cənubi Qafqaz Avropadan bir qədər aralı olsa də, onun hissəsi hesab olunur. "Qafqazı Avropanın qalan hissəsilə bağlayan tarixi, mədəni əlaqələr mövcuddur", - Volker söyləyib.
Onun sözlərinə görə, Cənubi Qafqazda öz suverenliyini və müstəqilliyini möhkəmləndirmək istəyən ölkələr var. "Düşünürəm ki, biz bu ölkələrin suverenliyini, müstəqilliyini və ərazi bütövlüyünü dəstəkləməliyik. Bu aydın olmalıdır", - o bildirib.
Volkerin fikrincə, daha bir mühüm məsələ regionun enerji planında əhəmiyyətidir. "Enerji nəqlində müxtəliflik Avropa üçün əhəmiyyətlidir. Bu, təkcə Rusiyaya deyil, digər ölkələrə və enerjinin digər formalarına da aiddir. Biz, əlbəttə, Rusiyadan neft və qaz alırıq, amma biz həm də Avropanı neft və qazla təmin edə biləcək başqa ölkələr də axtarmalıyıq", - Volker hesab edir.
NATO yanında Amerika missiyası rəhbərinin sözlərinə görə, bu, Rusiyanın daha Avropaya neft nəql etməyəcəyi demək deyil: "Əlbəttə, Rusiya bizə neft nəql edəcək. Amma biz eyni zamanda bir ölkənin dominant bazarının inhisarçılığından qaçmaq istəyirik - bu, qeyri - sağlam bazar vəziyyətidir", - Volker söyləyib.
Məqalə müəllifiə əlaqə ünvanı: [email protected]