Azərbaycan, Bakı, 18 noyabr / Trend , müxbir C.Babayeva/ Vaxtilə müxalif "Bizim Azərbaycan" blokunda təmsil olunmuş siyasi partiyalar Müxalifətin Əməkdaşlıq Mərkəzinin sıralarını genişləndirə bilər.
"Müsavat Partiyası iqtidara və mövcud siyasi şəraitə münasibətdə eyni mövqe tutan bütün siyasi partiyaların bir mərkəzdə tərəfdaşlığına nail olmaq ideyasını irəli sürüb. Müxalifətin Əməkdaşlıq Mərkəzində təmsil olunan digər partiyalar tərəfindən bu ideya qəbul olunsa, vaxtilə "Bizim Azərbaycan" blokunda təmsil olunmuş partiyaların da müxalifətin ümumi əməkdaşlığında iştirakı istisna olunmur", - deyə Müxalifətin Əməkdaşlıq Mərkəzində (MƏM) təmsil olunan Müsavat Partiyası Mərkəzi İcra Aparatının rəhbəri Arif Hacılı çərşənbə axşamı Trend - a bildirib.
Trend - un arayışı: Müxalifətin Əməkdaşlığı Mərkəzinə "Azadlıq" bloku (Azərbaycan Xalq Cəbhəsi, Liberal, Vətəndaş və İnkişaf partiyaları), Müsavat partiyası və "Azərbaycan naminə" İctimai Forum daxildir. Sentyabrın əvvəlində bu siyasi təşkilatlar oktyabrın 15 - də keçiriləcək prezident seçkisini qanunsuz tanımaq barədə birgə bəyanat imzalayıblar. Bəyanatda prezident seçkisindən sonra formalaşacaq hakimiyyət qeyri - legitim elan edilib.
Vaxtilə müxalif "Bizim Azərbaycan" blokunda təmsil olunan partiyalar Müsavat Partiyasının ətrafında bələdiyyə seçkisi ilə bağlı blok yaradırlar. 24 müxalifət partiyasının təmsil olunduğu "Bizim Azərbaycan" bloku 2003 - cü ildə keçirilmiş prezident seçkisi dövründə prezidentliyə namizəd, Müsavat Partiyasının başqanı İsa Qəmbərin namizədliyini dəstəkləmək üçün yaradılmışdı.
Hacılı vaxtilə "Bizim Azərbaycan" blokunda təmsil olunmuş siyasi partiyaların Müsavat Partiyası ətrafında yeni blok yaratmasının müzakirə olunmadığını bildirib. "Blokda təmsil olunan partiyaların Müsavatla mütəffiqlik münasibətləri davam edir. Söhbət blokun yaradılmasından deyil, bələdiyyə seçkisində həmin partiyaların namizədlərinin müdafiə olunmasından gedir", - deyə Hacılı bildirib.
O, Müsavat Partiyasının bələdiyyə seçkisi ilə bağlı Müxalifətin Əməkdaşlıq Mərkəzindən kənar siyasi partiyalarla əməkdaşlığının Mərkəzdə təmsil olunmasına qətiyyən təsir göstərməyəcəyini bildirib. "Müsavat bələdiyyə seçkilərində müxalifətin digər qüvvələrinin də birgə iştirakının tərəfdarıdır. Bələdiyyə seçkisi dövründə müxalifətin vahid koalisiyasının yaradılması mümkündür. Ona görə də, Müsavat bu seçkilərdə birgə iştirakla bağlı Müxalifətin Əməkdaşlıq Mərkəzinə daxil olan bəzi partiyalarla da ilkin söhbətlər aparıb", - deyə Hacılı bildirib.
Hacılı əlavə edib ki, Müsavat partiyası vaxtilə "Bizim Azərbaycan" blokunda təmsil olunan partiyaların Müxalifətin Əməkdaşlıq Mərkəzinə daxil olması ilə bağlı deyil, onların bu qurumun yaradıcısı sırasında olmasını təklif edə bilər.
Müxalifətin Əməkdaşlıq Mərkəzində təmsil olunan müxalif "Azadlıq" blokunun həmsədri, Vətəndaş və İnkişaf Partiyasının sədri Əli Əliyev Müsavat Partiyası ətrafında bələdiyyə seçkisi ilə bağlı blokun yaradılması haqqında məlumatların partiyanın rəsmi mövqeyi ilə bağlı məlumatı olmadığını bildirib. "İstənilən partiya addımlarında müstəqildir. Müsavat Partiyasının bələdiyyə seçkiləri ilə bağlı hər hansı bir qurum yaratmaq niyyəti Müxalifətin Əməkdaşlıq Mərkəzində təmsil olunub - olunmamasına təsir edə biləcək amil deyil. Partiya əməkdaşlıq mərkəzinin formatına münasibət bildirmək hüququnu özündə saxlayır", - deyə Əliyev Trend -a bildirib.
Məqalə müəllifi ilə əlaqə saxlamaq üçün ünvan: [email protected]