Azərbaycan, Bakı, 06 yanvar/ Trend , müxbir B.Həsənov/ Türkiyənin dini işlər naziri Əli Bardakoğlu hesab edir ki, son Qəzzə hadisələrində müsəlman aləmi lazımi reaksiya göstərməyib. "Müsəlman aləmi son Qəzzə hadisələrində imtahandan keçə bilmədi. Xüsusilə böyük iqtisadi gücə və beynəlxalq nüfuza sahib olan müsəlman ölkələrinin bu məsələlərdə səssiz qalması təəssüf doğurur", - deyə Bardakoğlu Ankaradan telefonla Trend - a bildirib.
Trend - un arayışı: Dekabrın 27 - də günorta saatlarından başlayaraq, İsrailin Hərbi Hava Qüvvələri Qəzzə Zolağını raket atəşinə tutublar. Dekarbın 19 - da Həmas təşkilatı və Israil arasında müvəqqəti atəşkəsin başa çatmasından sonra, Həmas dörd fələstinlinin qətlinə cavab olaraq, Israilin Sderot va Aşkelon yaşayış məntəqələrini raket atəşinə tutub.
BBC - nin Fələstin səhiyyə xidmətinə istinadən verdiyi məlumata görə Israilin dekabrın 27- də keçirdiyi hərbi əmaliyyatlar zamanı 550 nəfər həlak olub, 2700 nəfər yaralanıb.
Həmas İsrailin Qəzzə zolağının bombalamasına cavab olaraq, Sderot və Aşkelon yəhudi məntəqələrinə 60 - a yaxın raket zərnbəsi endirib. İsrail höküməti Aşkelon və Sderotda fövqaladə vəziyyət elan edib. Yanvarın 3 -dən İsrail ordusu Qəzzə Zolağında quru əməliyyatlarına başlayıb.
Qəzzədəki hadisələrin artıq müharibə yox, qətliam olduğunu bildirən Bardakoğlu son hadisələrin regionda qisas, kin və nifrət hisslərini dərinləşdirdiyini bildirib. "Günahsız uşaqların öldürülməsini, məktəblərə, məscidlərə və xəstəsanalara bomba atılmasını necə haqlı hesab etmək olar ?", - deyə Bardakoğlu əlavə edib.
Bardakoğlu, nüfuzlu Qərb ölkələrinin İsrailin hərəkətlərini pisləyən bəyanatlar verməyi də çox gördüklərini və insanlıq borclarını yerinə yetirmədiklərini bildirib.
Bardakoğlu İslam ölkələrinin də İsrailin hərəkətlərini pisləyən bəyanatlar verməklə kifayətləndiklərini və lazımi reaksiya göstərmədiklərini deyib. "Hərbi əməliyyatları pisləyən bəyanatlarla kifayətlənmək olmaz. Əsas məsələ bu qətliamı dayandırmaq üçün bütün vasitələrdən istifadə etmək, yaralıların müalicəsini təmin etmək və zərər çəkmiş insanlara humanitar yardım çatdırmaqdır", - deyə Bardakoğlu vurğulayıb.