...

Azərbaycanın hakim partiyası seçkilərdə iştirak edən siyası partiyaların dövlət büdcəsindən maliyyələşdirilməsinin tərəfdarıdır

Siyasət Materials 14 Yanvar 2009 14:39 (UTC +04:00)

Azərbaycan, Bakı, 14 yanvar / Trend , müxbir A.Hüseynbala/ Azərbaycanın hakim partiyası siyası partiyaların dövlət büdcəsindən maliyyələşdirilməsi üçün bir neçə prinsipin əsas götürülməsi tərəfdarıdır.

"Əsas prinsip partiyaların seçkidə iştirakı olmalıdır. Dünyanın bir çox demokratik ölkələrində də bu prinsipə üstünlük verilir" - cərşənbə günü Trend -a Yeni Azərbaycan Partiyası icra katibinin müavini, millət vəkili Siyavuş Novruzov bildirib.

Trend -un arayışı: Azərbaycanda 52 partiya Ədliyyə Nazirliyində dövlət qeydiyyatına alınıb. "Siyasi partiyalar haqqında" Qanun 1992 - ci ildə qəbul olunub. Ciddi dəyişikliklərdən sonra yenidən qəbul olunacaq qanunda partiyaların dövlət büdcəsindən maliyyələşdirilməsi də nəzərdə tutulacaq.

Müxalifəti təmsil edən siyasətçilər qeydiyyatdan keçən partiyalara dövlət büdcəsindən maliyyə ayrılmasını təklif edir. Azərbaycan hakimiyyəti isə büdcədən maliyyə vəsaiti ayrılması üçün partiyaların parlament seçkilərində iştirakının və qazandığı səslərin əsas götürülməsini təklif edir.

Müxalif partiyaların maliyyələşmə məsələsində dövlət qeydiyyatının əsas götürülməsi təklifinə gəldikdə isə Novruzov bununla razılaşmayıb.

"Azərbaycanda elə partiya var ki, 1992-ci ildə qeydiyyata alınsa da, indiyədək bir dəfə seçkidə iştirak etməyib. Bununla digər aktiv fəaliyyət göstərən partiyaları eyniləşdirmək ədalətli olmaz" - hakim partiya funksioneri əlavə edib.

Onun sözlərinə görə, dünyanın bir çox ölkələrində siyasi partiya iki ildən artıq fəaliyyət göstərmədikdə, onun qeydiyyatı dərhal ləğv olunur.

"Təbii ki, yeni yaranan partiya qeydiyyatdan keçirsə, ona büdcədən  yardım göstərmək olar. Digər partiyaların isə seçkidə iştirakı, qazandığı mandatlar əsas götürülməlidir", - Novruzov vurğulayıb.

YAP 1992-ci ildə о vаxt Naxçıvan Ali Məclisinin sədri olan Heydər Əliyev tət-rəfindən yaradılıb. Azərbaycanda 16 ildir hakim partiya olan YAP-ın indiki sədri prezident İlham Əliyevdir.

Məqalə müəllifi ilə əlaqə ünvanı: [email protected]



Xəbər lenti

Xəbər lenti