Azərbaycan, Bakı, 28 yanvar / Trend , müxbir A.Hüseynbala/ Azərbaycanın hakim partiyası müxalifətlə dialoqa və bunun üçün mövzuların araşdırılmasına hər zaman hazır olduğunu bəyan edib.
"Təkliflər olarsa, müzakirə edib, dialoqla bağlı fikrimizi söyləyə bilərik", - çərşənbə günü Trend -a hakim Yeni Azərbaycan Partiyası (YAP) icra katibinin müavini, millət vəkili Mübariz Qurbanlı bildirib.
Trend - un arayışı: Azərbaycanda ötən ilin oktyabrın 15-də keçirilən prezident seçkisindən sonra iqtidar-müxalifət dialoqu yenidən gündəmə gəlib.
Müxalifət və iqtidar tərəfinin dialoqa hazır olması ilə bağlı fikirlər səsləndirilsə də, hələki dialoqun formatı müəyyənləşdirilməyib.
2005-ci ilin parlament seçkiləri ərəfəsində ATƏT-in Bakı ofisinin vasitəçiliyi ilə müxalifət, hakim və hakimiyyətyönlü partiyalar arasında bir necə görüş keçirilib. Sonradan dialoqu davam etdirmək mümkün olmayıb. Ötən il oktyabrın 15-də keçirilən prezident seçkisində bir neçə müxalifət partiyası YAP-ın namizədini dəstəkləyib. Seçkidən sonra YAP-ın bu partiyalarla dialoqu məsələsi yenidən gündəmə gəlib.
Qurbanlının sözlərinə görə, hakim partiyanın keçirdiyi tədbirlərin hamısı siyasi təşkilatlar üçün açıq olur. "Bu tədbirlərə qatılan hər bir partiya bizimlə faktiki dialoq mühitindədir. Ona görə bununla bağlı xüsusi mövzunu seçib müzakirə aparmaq istəyi olarsa və hansısa partiya bunu təklif edərsə, biz də iştirak edə bilərik", - YAP funksioneri əlavə edib.
Hakim partiyanın nümayəndəsi deyib ki, cəmiyyətdə də dialoq mühiti var. "Biz müxtəlif partiyaların keçirdiyi tədbirlərə qatılaraq dialoqda iştirak edirik və öz tədbirlərimizə də onları dəvət edirik", - Qurbanlı vurğulayıb.
"Biz bir neçə məsələ ilə bağlı dialoqun keçirilməsi üçün hakim partiyaya müraciət edəcəyik", - çərşənbə günü Trend -a müxalif Böyük Quruluş Partiyasının (BQP) başqanı, millət vəkili Fazil Mustafa bildirib.
Onun sözlərinə görə, indi iqtidarla müxalifət arasında partiyaların cəmiyyətdə rolunun artırılması, proporsional seçki sisteminin bərpası və partiyaların dövlət büdcəsindən maliyyələşdirilməsi ilə bağlı müzakirələr aparılmasına daha çox ehtiyac var. "Biz bu məsələrlə bağlı Yeni Azərbaycan Partiyası ilə dialoqa hazırıq", - Mustafa əlavə edib.
YAP 1992-ci ildə o vaxt Naxçıvan Ali Məclisinin sədri olan Heydər Əliyev tərəfindən yaradılıb. Azərbaycanda 16 ildir hakim partiya olan YAP-ın indiki sədri prezident İlham Əliyevdir.
Müxalifətyönlü Böyük Quruluş Partiyası 2004-cü ildə yaradılıb, 2005-ci ildə dövlət qeydiyyatına alınıb. Partiyanın başqanı Fazil Mustafa (Fazil Qəzənfəroğlu) Milli Məclisin deputatıdır. Mustafa ötən il keçirilən prezident seçkisində namizəd olub və 2,4 faiz səs toplayıb.
Məqalə müəllifi ilə əlaqə ünvanı: [email protected]
