Azərbaycan, Bakı, 02 fevral/ Trend , müxbir A.Hüseynbala/ Azərbaycanın iqtidaryönlü partiyası referendumla bağlı hakim partiyanın təsis etdiyi təşviqat qrupu ilə birgə təbliğat kampaniyasında iştirak edəcək.
"Bizim partiyanın üzvləri fərdi şəkildə Yeni Azərbaycan Partiyasının təsis etdiyi "Yeni Azərbaycan" təşviqat qrupu ilə birlikdə təbliğat aparacaqlar", - bazar ertəsi Trend -a Ana Vətən Partiyasının (AVP) sədri, millət vəkili Fəzail Ağamalı bildirib.
Trend -un arayışı: Martın 18-də Azərbaycanda Konstitusiyanın 29-cu maddəsinə əlavə və dəyişikliklərin edilməsi məsələsi üzrə referendum keçiriləcək.
Referendum üzrə 13 təşəbbüs qrupu imza vərəqələrini Mərkəzi Seçki Komissiyasına (MSK) təhvil verib.
Hakim Yeni Azərbaycan Partiyasının referendum üzrə "Yeni Azərbaycan", "Şəhər" və "Tərəqqi" təşəbbüs qrupları MSK-da təbliğat qrupları kimi qeydiyyata alınıblar. "Abad kənd" təşəbbüs qrupu qeydə alınmayıb.
Fevralın 1-də saat 18:00-da təşəbbüs qruplarının imza vərəqlərinin MSK-ya təhvil verməsi müddəti başa çatıb.
Fevralın 10-na qədər Mərkəzi Seçki Komissiyası referendum üzrə "Vətəndaş Cəmiyyəti", "Hüquq və Demokratiya", "Azad söz", "Davamlı İnkişaf Naminə", "Qarabağ və Respublika Uğrunda Hərəkat", "Respublikaçılar", "Azərbaycan Xalq Cümhuriyyəti - AXC", "Milli İstiqlal" və "Zəka" təşəbbüs qruplarının qeydə alınması məsələsinə baxacaq.
Azərbaycan Konstitusiyası 1995-ci ildə qəbul edilib, 2002-ci ildə Əsas Qanuna əlavə və dəyişikliklər edilib.
Hakimiyyətyönlü AVP 1991-ci ildə yaradılıb. Partiya parlamentdə iki deputatla təmsil olunub.
Məqalə müəllifi ilə əlaqə ünvanı: [email protected]
