Azərbaycan, Bakı, 06 fevral/ Trend , müxbir E.Tariverdiyeva/ ABŞ Qırğızıstan hökumətindən "Manas" hərbi bazasının bağlanması barədə rəsmi xəbərdarlıq almayıb. Bu barədə cümə günü Trend -a müsahibəsində ABŞ Dövlət katibi müavininin köməkçisi Metyu Brayza bildirib.
Çərşənbə günü "Manas"da Amerika hərbi bazasının bağlanması barədə Qırğızıstan hökumətinin qərarı məlum olub. Bu barədə Qırğızıstan prezidenti Kurmanbek Bakiyev Moskvada aparılan danışıqların yekunu üzrə keçirilən mətbuat konfrasında bildirib.
ABŞ-ın Qırğızıstan paytaxtında "Manas" beynəlxalq aeroportu ərazisində hərbi bazası 2001-ci ilin dekabrında açılıb. Aviabaza koalisiya qüvvələrinin BMT-nin mandatına əsasən Əfqanıstanda apardığı "Sarsılmaz azadlıq" antiterror əməliyyatlarına dəstək üçün yaradılıb.
Hazırda aviabazada ABŞ-ın mindən artıq hərbçisi, həmçinin hərbi-nəqliyyat təyyarələri var.
"Hazırda biz Qırğızıstanın bu bazanı bağlaması qərarı barədə rəsmi xəbərdarlıq almamışıq", -deyə Brayza bildirib.
Brayzanın sözlərinə görə, hazırda ABŞ Qırğızıstanın hakim dairələri ilə bazanın statusunu müzakirə edir.
...