Azərbaycan, Bakı, 25 fevral / Trend , müxbir A.Hüseynbala /
Azərbaycanın hakimiyyətyönlü partiyası referendumla bağlı təşviqat kampaniyasında Konstitusiyaya təklif olunan əlavə və dəyişiklikləri dəstəkləyən bir neçə təşviqat qrupu ilə birgə əməkdaşlıq edəcək.
"Partiyanın sədr müavini, millət vəkili Zahid Oruc "Tərəqqi" təşviqat qrupunun vəkil edilmiş şəxslərindən biri kimi fəaliyyət göstərəcək", - çərşənbə axşamı Trend -a Ana Vətən Partiyasının (AVP) sədri, millət vəkili Fəzail Ağamalı bildirib.
Тrend Nеws-un arayışı: Azərbaycanda referendumla bağlı təsis edilən təşviqat qrupları fevralın 18-dən etibarən təbliğat kampaniyasına start veriblər.
Mərkəzi Seçki Komissiyasının qərarı ilə həftə ərzində bir dəfə 90 dəqiqə İctimai Televiziyada, 90 dəqiqə isə İctimai Radioda efir vaxtı müəyyənləşdirilib. Televiziyada efir vaxtı saat 18:15-dən, radioda isə saat 20:15-dən başlayacaq. Təşviqat kampaniyası zamanı bütün təşviqat qrupları üçün həm televiziyada, həm də radioda dörd dəfə pulsuz efir vaxtə ayrılacaq.
Referendumla bağlı qəbul olunmuş təqvim planına əsasən, təbliğat kampaniyası martın 16-da saat 24:00-da başa çatdırılmalıdır.
Martın 18-də Azərbaycanda ölkə Konstitusiyasına əlavə və dəyişikliklərin edilməsi üzrə referendum keçiriləcək.
Referendum üzrə "Yeni Azərbaycan", "Şəhər", "Tərəqqi", "Hüquq və demokratiya", "Vətəndaş Cəmiyyəti", "Davamlı İnkişaf Naminə", "Zəka", "Qarabağ və Respublika Uğrunda Hərəkat" və "Respublikaçılar" təşəbbüs qrupları MSK-da təşviqat qrupları kimi qeydiyyata alınıblar. "Abad kənd", "Azad söz", "Azərbaycan Xalq Cümhuriyyəti" və "Milli İstiqlal" təşəbbüs qrupları qeydiyyatdan keçməyib.
Azərbaycan Konstitusiyası 1995-ci ildə qəbul olunub, 2002-ci ildə Əsas Qanuna dəyişikliklər edilib.
Ağamalının sözlərinə görə, partiyanın rəhbərliyində təmsil olunan digər funksionerlərə, eləcə də şəhər və rayon təşkilatlarına təşviqat kampaniyasında fəal təbliğat aparmaq üçün tapşırıqlar verilib. "Biz təkcə təşviqat kampaniyasında fəallıq göstərmək niyyətində deyilik. Düşünürəm ki, partiyamızın bütün üzvləri martın 18-də referenduma çıxarılan məsələlərin lehinə də səs verəcəklər", - AVP sədri əlavə edib.
Hakimiyyətyönlü AVP 1991-ci ildə yaradılıb. Partiya parlamentdə iki deputatla təmsil olunub.
Məqalə müəllifi ilə əlaqə ünvanı:[email protected]
