Azərbaycan, Bakı, 27 fevral / Trend , müxbir A.Hüseynbala / Azərbaycanın müxalif partiyalarının referendumla bağlı təsis etdiyi təşviqat qrupu martın 1-də ilk aksiyasını keçirəcək.
"Bakı Şəhər İcra Hakimiyyəti seçicilərlə görüşmək üçün bizə "Təbriz" kinoteatrında yer ayırıb", - cümə axşamı Trend -a "Qarabağ və Respublika Uğrunda Hərəkat"da təmsil olunan Azərbaycan Xalq Cəbhəsi Partiyasının (AXCP) sədr müavini Həsən Kərimov bildirib.
Тrend Nеws-un arayışı: Azərbaycanda referendumla bağlı təsis edilən təşviqat qrupları fevralın 18-dən etibarən təbliğat kampaniyasına start veriblər.
Mərkəzi Seçki Komissiyasının qərarı ilə həftə ərzində bir dəfə 90 dəqiqə İctimai Televiziyada, 90 dəqiqə isə İctimai Radioda efir vaxtı müəyyənləşdirilib.
Televiziyada efir vaxtı saat 18:15-dən, radioda isə saat 20:15-dən başlayacaq.
Təşviqat kampaniyası zamanı bütün təşviqat qrupları üçün həm televiziyada, həm də radioda dörd dəfə pulsuz efir vaxtə ayrılacaq.
Referendumla bağlı qəbul olunmuş təqvim planına əsasən, təbliğat kampaniyası martın 16-da saat 24:00-da başa çatdırılmalıdır.
Martın 18-də Azərbaycanda ölkə Konstitusiyasına əlavə və dəyişikliklərin edilməsi üzrə referendum keçiriləcək.
Referendum üzrə "Yeni Azərbaycan", "Şəhər", "Tərəqqi", "Hüquq və demokratiya", "Vətəndaş Cəmiyyəti", "Davamlı İnkişaf Naminə", "Zəka", "Qarabağ və Respublika Uğrunda Hərəkat" və "Respublikaçılar" təşəbbüs qrupları MSK-da təşviqat qrupları kimi qeydiyyata alınıblar. "Abad kənd", "Azad söz", "Azərbaycan Xalq Cümhuriyyəti" və "Milli İstiqlal" təşəbbüs qrupları qeydiyyatdan keçməyib.
Azərbaycan Konstitusiyası 1995-ci ildə qəbul olunub, 2002-ci ildə Əsas Qanuna dəyişikliklər edilib.
Kərimovun sözlərinə görə, Bakı Şəhər İcra Hakimiyyəti mitinq keçirmək üçün Bibiheybət meydanını təklif etdiyindən martın 1-nə nəzərdə tutulan aksiya təxirə salınıb. "Bu səbəbdən təşviqat qrupu həmin gün yalnız seçicilərlə qapalı yerdə görüşməyi məqbul hesab edir", - AXCP funksioneri əlavə edib.
"Qarabağ və Respublika Uğrunda Hərəkat"ı Azərbaycan Xalq Cəbhəsi, Vətəndaş və İnkişaf, Demokrat, Müsavat və Ümid partiyaları, Milli Birlik Hərəkatı, eləcə də bir neçə ictimai təşkilat təsis edib.
Hərəkatda təmsil olunan siyasi və ictimai qurumlar fevralın 22-də ilk etiraz mitinqini keçirmək üçün yer ayrılması üçün Bakı Şəhər İcra Hakimiyyətinə xəbərdarlıq məktubu göndərib. Məktubda 8 yerdən birində - Prezident Aparatının 200 metr radiusunda yerləşən "Azneft" meydanında, Nazirlər Kabinetinin 200 metr radiusunda Teleteatrın ətrafındakı ərazidə, "Nərimanov" kinoteatrının qarşısındakı meydanda, Məşədi Əzizbəyov heykəlinin önündə, Hüseyn Cavid meydanında, Səməd Vurğun bağında, Füzuli meydanında və ya Cəfər Cabbarlının heykəlinin yaxınlığındakı meydanda mitinqə şərait yaradılması istənilirdi.
Məqalə müəllifi ilə əlaqə ünvanı:[email protected]
