Azərbaycan, Bakı, 13 mart / Trend , müxbir K.Zərbalıyeva /
Bakı Şəhər Baş Polis İdarəsi terrorçuluqla bağlı anonim telefon zənglərinin çoxalmasının səbəbini müəyyənləşdirməkdə çətinlik çəkir.
"Son vaxtlar anonim telefon zənglərinin çoxalmasının səbəbini müəyyənləşdirmək çətindir", - Bakı Şəhər Baş Polis İdarəsinin mətbuat xidmətinin rəhbəri Qalib Arif cümə günü Trend -a bildirib.
Son belə hadisə dünən Bakı metropoliteninin "İçəri şəhər" stansiyasında qeydə alınıb. Daxili İşlər Nazirliyinin "qaynar xətt"inə zəng edərək stansiyaya partlayıcı qurğu qoyulması barədə məlumat verilib.
Lakin aparılan yoxlamalar zamanı məlumat təsdiq olunmayıb.
Səbail Rayon Polis İdarəsindən cümə günü Trend -a verilən məlumata görə, faktla bağlı Cinayət Məcəlləsinin terrorçuluq barədə bilə-bilə yalan məlumat vermə (216-cı) maddəsi ilə cinayət işi açılıb, istintaq gedir.
Anonim zəngin kim tərəfindən edildiyi isə hələlik müəyyənləşdirilməyib.
"Bunlar təxribat, ya əvvəlcədən hazırlanan aksiyadır, yaxud nəticəsi düşünülmədən edilən hərəkətdir, bunu müəyyənləşdirmək çətindir. İndiyədək açılmış bir neçə işdə həmin zənglərin məktəb yaşlı uşaqlar tərəfindən edildiyi müəyyənləşib və onlar çox zaman bu hərəkətin cinayət olduğundan xəbərsiz olduqlarını bildiriblər", - mətbuat xidmətinin rəhbəri vurğulayıb.
Arif bu faktlarla bağlı başlanmış cinayət işləri üzrə istintaq hərəkətlərinin davam etdirildiyini deyib.
Sabiq polis rəisi, ekspert Mahmud Hacıyev bu əməlin ağır cinayət tərkibli əməl olduğunu bildirib və bu faktların son illər artımasının səbəbini hüquqi maarifləndirmənin aşağı səviyyədə olması ilə əlaqələndirib.
Onun sözlərinə görə, hüquq-mühafizə orqanları belə faktlarla mübarizə aparır və bu faktların açılması istiqamətində əziyyət çəkir.
"Lakin əhali arasında hüquqi maarifləndirmə aparılmır. Elə adam var ki, bu əməlin cinayət tərkibi yaratdığını bilmir və bilməyərəkdən bu cinayəti törədir", - deyə ekspert Trend -a deyib.
Hacıyevin fikrincə, vətəndaşlar bu hərəkətə görə, cinayət məsuliyyətinə cəlb olunacaqlarını bilərsə, terrorçuluq barədə bilə-bilə yalan məlumat vermə halları da olmaz.
Bu il ərzində metronun "Nizami" stansiyasına, İncəsənət Gimnaziyasına, Nizami rayonu ərazisindəki kafelərdən birinə, Mingəçevir şəhərindəki orta məktəblərdən birinə partlayıcı qurğu qoyulması ilə bağlı polisə anonim məlumatlar daxil olub.
Məqalə müəllifi ilə əlaqə ünvanı:[email protected]
