Azərbaycan, Bаkı, 18 may / Trend , müxbir A.Hüseynbala /
Azərbaycanın bir qrup müxalif partiyasının təmsil olunduğu hərəkat bələdiyyə seçkilərində blok kimi iştirak etməyəcək.
"Hərəkatın blok kimi təsis olunmasında bir sıra problemlər ortaya çıxdığından, hər bir partiyanın bələdiyyə seçkilərində öz namizədləri ilə iştirak etməsi qərara alınıb", - bazar ertəsi Trend -a "Qarabağ və Respublika Uğrunda Hərəkat"da təmsil olunan Azərbaycan Demokrat Partiyasının (ADP) sədri Sərdar Cəlaloğlu bildirib.
Trend -un arayışı: Azərbaycanda bələdiyyə seçkisi 2009-cu ilin sonunda, parlament seçkisi isə 2010-cu ilin payızında keçirilməlidir. Bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
"Qarabağ və Respublika Uğrunda Hərəkat"da təmsil olunan Müsavat, Demokrat partiyaları bir müddət əvvəl bələdiyyə seçkilərində öz namizədləri ilə iştirak etmək barədə qərar qəbul edib. Hərəkatda "Azadlıq" blokunun üzvləri kimi təmsil olunan partiyaların da eyni addımı atacağı gözlənilir.
Cəlaloğlunun sözlərinə görə, bu qərarın qəbuluna əsas səbəb seçki kampaniyası zamanı aparılacaq sənədləşmə ilə bağlıdır. "Hərəkat blok kimi seçkilərdə iştirak edərsə qanunvericiliyə görə, qəbul olunan hər bir sənəd burada təmsil olunan partiyaların Ali Məclislərində təsdiqlənməlidir", - ADP sədri əlavə edib.
Onun fikrincə, blok kimi seçkilərdə iştirak etmək əlavə problemlər, eləcə də kifayət qədər əlavə maliyyə vəsaiti tələb etdiyindən hər bir partiyanın ayrılıqda iştirakı daha məqbuldur. "Buna baxmayaraq, hərəkatda təmsil olunan bütün partiyalar bir-birinin namizədini müdafiə edəcək, təbliğat kampaniyasında birgə iştirak edəcəyik", - Cəlaloğlu vurğulayıb.
"Qarabağ və Respublika Uğrunda Hərəkat"ı Azərbaycan Xalq Cəbhəsi, Vətəndaş və İnkişaf, Liberal, Demokrat, Müsavat və Ümid partiyaları, eləcə də bir neçə ictimai təşkilat təsis edib.
Sаğ təmаyüllü partiya olan ADP 1991-ci ildə Cəlaloğlu tərəfindən təsis edilib. Partiya 2007-ci ilin yanvarınadək iqtidara qarşu radikal müxalif mövqedə olub. 2008-ci ilin yanvarında ADP-nin hakimiyyətlə dialoq qurulmasu ilə bağlı yeni siyasi kursu qəbul edilib. Buna etiraz olaraq keçmiş sədr Rəsul Quliyev və tərəfdarlaru ADP-dən imtina edərək özlərinin Açıq Cəmiyyət Partiyasını yaradıblar.
Məqalə müəllifi ilə əlaqə ünvanı:[email protected]
