Azərbaycan, Bаkı, 18 may / Trend , müxbir A.Hüseynbala /
Azərbaycanın müxalifyönlü partiyası bələdiyyə seçkilərində birgə iştirak etmək üçün altı partiya ilə danışıqlar aparır.
"Azad Azərbaycan" blokunun təsis olunması üçün təkliflər paketini partiyalara təqdim etmişik və onlar məsləhətləşmələrdən sonra cavab verəcəklər", - bazar ertəsi Trend -a Azərbaycan Liberal-Demokrat Partiyasının (ALDP) sədri Fuad Əliyev bildirib.
Trend -un arayışı: Azərbaycanda bələdiyyə seçkisi 2009-cu ilin sonunda, parlament seçkisi isə 2010-cu ilin payızında keçirilməlidir. Bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
Əliyevin sözlərinə görə, blok yaradılması niyyətləri baş tutmayacağı halda bələdiyyə seçkilərində təkbaşına iştirak edəcəklər. "Biz blok təsis etməklə bağlı fəaliyyətimizi sentyabr ayına qədər davam etdirəcəyik. Əgər bu müddətdə müraciət etdiyimiz partiyalardan müsbət cavab almasaq, seçkilərdə öz namizədlərimizi irəli sürəcəyik", - partiya sədri əlavə edib.
ALDP sədri deyib ki, artıq partiyanın bütün rayon təşkilatlarına namizədlərin müəyyənləşdirilməsi haqda tapşırıq da verilib. "Bələdiyyə üzvü seçilməyə iddialılar çox olur. Ona görə bir neçə partiyanın birgə iştirakı zamanı daha şanslı namizədləri müəyyənləşdirib onların səsvermədə qalib gəlməsin təmin etmək mümkündür", - Əliyev vurğulayıb.
АLDP 1999-cı ildə yaradılıb. 2000-ci ildə partiyanın sədri Zakir Məmmədov vəfat etdikdən sonra 2001-ci ildə ALDP ikiyə bölünüb. Valeh Ibadov və Fuad Əliyev hər ikisi ALDP adına iddia ediblər. 2004-cü ildə Ali Məhkəmənin qərarı ilə Fuad Əliyevin rəhbərlik etdiyi partiya ALDP kimi tanınıb və dövlət qeydiyyatından keçib.
Məqalə müəllifi ilə əlaqə ünvanı: [email protected]
