Azərbaycan, Bakı, 11 iyun / Trend , müxbir A. Hüseynbala /
Azərbaycanın Avropa Şurası Parlament Assambleyasındakı (AŞ PA) nümayəndə heyəti qurumun baş katibliyinə namizədlərin hər birinin Azərbaycana münasibətinin müsbət olduğunu düşünür.
"Bizim nümayəndə heyətinin altı üzvünün hər biri müxtəlif siyasi qurumların təmsilçiləri olduqlarından, kimə səs verəcəklərini özləri müəyyənləşdirəcəklər", - cümə axşamı Trend -a Azərbaycanın AŞ PA-dakı nümayəndə heyətinin üzvü Gültəkin Hacıbəyli bildirib.
Trend -un arayışı: Avropa Şurası Parlament Assambleyasının yay sessiyası iyunun 22-26-da keçiriləcək. Ayın 23-24-də Avropa Şurasının yeni Baş katibinin seçilməsi nəzərdə tutulur. Şuranın indiki Baş katibi Terri Devisin fəaliyyət müddəti 2009-cu il avqustun 31-də başa çatır.
Hacıbəylinin sözlərinə görə, seçkilərlə bağlı assambleyanın atacağı addım bəlli olmadığından, hansı namizədi dəstəkləmək haqda konkret söz demək olmur.
"Ötən sessiyada Nazirlər Kabineti ilə assambleya arasında çox ciddi ziddiyət yaranmışdı. Nəticədə assambleyanın iki namizədini Nazirlər Kabineti təsdiq etməmişdi. Narazılıq indiyə qədər həll olunmayıb", - millət vəkili əlavə edib.
Hacıbəyli deyib ki, baş katıb seçilmək uğrunda dörd namizəd arasında mübarizə gedir.
"Komitə Norveç və Polşa nümayəndələrindən birinin namizədliyinə təkid edir. Assambleyada hansı namizədlərlə bağlı səsvermə keçiriləcəyi haqda konkret qərar olmadan kimin necə səs verəcəyini proqnozlaşdırmaq da çətindir", - Hacıbəyli deyib.
Millət vəkilinin fikrincə, AŞ PA-nın hər bir üzvü seçimində azad olduğundan baş katibin kimin seçiləcəyini söyləmək çətindir.
Avropa Şurasının Baş katibi vəzifəsinə namizədlərdən biri Norveç parlamentinin sədri Torbyorn Yaqlanddır. O, müxtəlif dövrlərdə Norveçin dövlət və xarici işlər nazirləri vəzifələrində çalışıb. Onun Avropada kifayət qədər yüksək nüfuza malik olduğu bildirilir.
İkinci namizəd AŞPA-nın Belçikadan olan nümayəndəsi Lyuk van der Brandedir. Digər namizədlər Polşanın sabiq baş naziri Vlodzimej Çimoşeviç və Macarıstan parlamentinin deputatı Matias Yorşıdir.
Avropalı analitiklər Polşa və Norveçdən olan nümayəndələri baş katib postuna ən yaxşı namizədlər hesab edirlər.
Məqalə müəllifi ilə əlaqə ünvanı: [email protected]