Azərbaycan, Bakı, 04 avqust / Trend , müxbir C.Babayeva /
Azərbaycanın ictimai-siyasi təşkilatları Dağlıq Qarabağ məsələsi ilə bağlı ümumrespublika forumunun keçirilməsi təşəbbüsü ilə çıxış ediblər.
"Ölkədə fəaliyyət göstərən bütün ictimai və siyasi təşkilatların iştirakı ilə ümumrespublika forumu keçirilməlidir. Bunun üçün komissiya yaradılacaq", - Trend -un məlumatına görə, çərşənbə axşamı keçirilən "Dağlıq Qarabağ probleminin həllində siyasi partiyaların və QHT-lərin rolu və vəzifələri" mövzusunda elmi-nəzəri konfransda Vətəndaş Həmrəyliyi Partiyasının sədri, millət vəkili Sabir Rüstəmxanlı bildirib.
Onun sözlərinə görə, forumun keçirilməsi payız aylarında nəzərdə tutulur.
"Dağlıq Qarabağ məsələsi ilə bağlı müzakirələrdə gənclərin iştirakı çox zəifdir. Ayrı-ayrı siyasi partiyalar ətrafında birləşən gəncləri bir araya gətirmək çətindir. Dağlıq Qarabağ məsələsi kimi ümummilli məsələdə gənclər də öz mövqelərini bildirməlidirlər", - o deyib.
"Dağlıq Qarabağ probleminin həllində siyasi partiyaların və QHT-lərin rolu və vəzifələri" mövzusunda elmi-nəzəri konfransın yekununda Madrid prinsipləri ilə bağlı etiraz bəyanatının hazırlanması qərara alınıb. Tədbir iştirakçıları Dağlıq Qarabağ münaqişəsinin Madrid prinsipləri əsasında həllini milli maraqlara zidd və suverenliyə təhlükə kimi qiymətləndirilər.
Trend -un arayışı: İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. 1991-ci ilin dekabr ayında Dağlıq Qarabağ Şuşa və Xocalı istisna olmaqla Azərbaycanın nəzarətindən çıxıb. 1992-93-cü illərdə Şuşa, Xocalı və Dağlıq Qarabağa bitişik yeddi rayon işğal olunub. 1994-cü ilin mayında tərəflər atəşkəs rejiminə dair razılaşma əldə ediblər və o vaxtdan bəri, ATƏT-in Minsk Qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
Məqalə müəllifi ilə əlaqə ünvanı: [email protected]
