ABŞ, Vaşinqton, 20 avqust / Trend , müxbir N.Boqdanova /
Gürcüstanın ABŞ-dakı səfiri Batu Kuteliya hesab edir ki, Avropa İttifaqı (Aİ) Gürcüstanın işğal olunmuş ərazilərinə müşahidəçilərin buraxılması üçün Rusiya qüvvələrinə təzyiqi davam etdirməlidir. Belə ki, genişmiqyaslı beynəlxalq mövcudluq münaqişələrin nizamlanması üçün həlledici əhəmiyyət daşıyır.
"Aİ-nın missiyasının möhkəmlənməsi və güclənməsinə imkan verən hər bir şey - ABŞ nümayəndələrinin iştirakı və ya digər tədbirlər tamamilə alqışlanır", - Trend -a Kuteliya bildirib.
Gürcüstanın xarici işlər nazirinin müavini Qiqa Bokeriya iyulun 21-də Vaşinqton ilə Aİ arasında Gürcüstandakı müşahidə missiyasına ABŞ nümayəndələrinin də daxil edilməsi üzrə danışıqların aparılmasını bəyan edib. Onlar Cənubi Osetiya və Abxaziya sərhədindəki vəziyyətin monitorinqi ilə məşğul olur. Bu barədə Reuters agentliyi yazır.
Onun sözlərinə görə, Rusiya tərəfindən Gürcüstandakı ATƏT missiyası və BMT-nın müşahidə missiyasının dayandırılmasından sonra Aİ-nın müşahidə missiyası əsas oldu.
"Müzakirələrin başlamasına baxmayaraq, bütün prosedurlar kompleksi, eyni zamanda, missiyanın genişləndirilməsi üzrə danışıqlara görə Aİ məsuliyyət daşıyır", - o bildirib.
Tanınmamış Cənubi Osetiya Respublikasında hərbi əməliyyatlar ötən il avqustun 8-də başlayıb. Gürcü qoşunları paytaxt Sxinvaliyə daxil olub, daha sonra rus ordusu şəhəri tutub və gürcü hərbçilərini Gürcüstan ərazisinə sıxışdırıb. Avqustun 26-da Rusiya rəsmi olaraq Gürcüstanın tərkibinə daxil olan Abxaziya və Cənubi Osetiyanın müstəqilliyini tanıyıb, sentyabrın 9-da isə onlarla diplomatik əlaqələr qurub. Buna cavab olaraq rəsmi Tbilisi Moskva ilə diplomatik münasibətləri kəsərək, iki tanınmamış ərazini işğal olunmuş ərazilər elan edib.
"Bunula yanaşı, biz hesab edirik ki, Aİ Gürcüstanın işğal olunmuş ərazilərinə müşahidəçilərin buraxılması üçün Rusiyanın işğalçı qüvvələrinə təzyiqi davam etdirməlidir. Biz hesab edirik ki, mükəmməl polis və sülhyaradıcı mexanizmlər məcburi köçkünlərin qaytarılması və Gürcüstanın ərazi bütövlüyünün bərpası üçün çox vacibdir", - Kuteliya bildirib.
Məqalə müəllifi ilə əlaqə ünvanı: [email protected]
