Azərbaycan, Bakı, 31 avqust / Trend , müxbir A.Hüseynbala /
Azərbaycanın müxalifət partiyalarının rəhbərləri bələdiyyə seçkilərində müxalifətin uğur qazanacağına inanmırlar.
"Bunun əsas səbəbi bölgələrdə seçicilərin fəallığı daha aşağıdır və rayonlar səviyyəsində müxalifətin seçkiyə nəzarət imkanları xeyli məhduddur", - bazar ertəsi Trend -a Böyük Quruluş Partiyasının başqanı, deputat Fazil Mustafa bildirib.
Trend -un arayışı: Azərbaycanda bələdiyyə seçkisinin 2009-cu il dekabrin ortalarında keçiriləcəyi gözlənilir. Bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
May ayında Azərbaycan parlamentində "Bələdiyylərin birləşdirilməsi haqqında" qanun qəbul edilib. Qəbul edilən qanuna görə, Azərbaycanda bələdiyyələrin sayı 2757-dən 1766-ya enib.
Mustafanın sözlərinə görə, səsvermə prosesinə nəzarəti, müşahidə prosesini daha yüksək səviyyədə təşkil etmək mümkün olarsa, müxalifət kifayət qədər ciddi uğur qazana bilər. "Bu səbəbdən müxalifətin seçkilərdə iştirakı təbliğat aparmaq məqsədilə bir neçə yer qazanmaq üçün əhəmiyyətli sayılmalıdır", - partiya sədri əlavə edib.
Müxalifətyönlü Böyük Quruluş Partiyası 2004 - cü ildə yaradılıb, 2005 - ci ildə dövlət qeydiyyatına alınıb. Partiyanın sədri Fazil Mustafa (Fazil Qəzənfəroğlu) Milli Məclisin deputatıdır. Partiya sədri 2008-ci ildə keçirilən prezident seçkisində namizəd olub və 2,4 faiz səs toplayıb.
"Radikal müxalifət partiyalarının bələdiyyə seçkilərində uğur qazanması inandırıcı deyil", - bazar ertəsi Trend -a Azərbaycan Liberal-Demokrat Partiyasının (ALDP) sədri Fuad Əliyev bildirib.
Onun fikrincə, konstruktiv müxalifət partiyalarından olan namizədlərin isə seçkilərdə qalib gəlmək imkanları daha çoxdur. "Zənnimcə, 2008-ci il prezident seçkilərində iştirak edən müxalifət partiyalar bələdiyyə seçkilərində bir daha addım-addım irəli getdiklərini göstərəcəklər", - partiya sədri vurğulayıb.
АLDP 1999-cı ildə yaradılıb. 2000-ci ildə partiyanın sədri Zakir Məmmədov vəfat etdikdən sonra 2001-ci ildə ALDP ikiyə bölünüb. Valeh Ibadov və Fuad Əliyev hər ikisi ALDP adına iddia ediblər. 2004-cü ildə Ali Məhkəmənin qərarı ilə Fuad Əliyevin rəhbərlik etdiyi partiya ALDP kimi tanınıb və dövlət qeydiyyatından keçib.
Məqalə müəllifi ilə əlaqə ünvanı: [email protected]
