Azərbaycan, Bakı, 01 oktyabr / Trend , müxbir A.Hüseynbala/
Azərbaycanın müxalifət partiyası təmsil olunduğu hərəkat daxilində yaranan problemin həlli üçün təklif olunan şərtə əməl etməyə hazırdır.
"Azərbaycan Liberal Partiyasından həmin təkliflər daxil olan kimi biz həm komissiya üzvlərimizin fəaliyyətinin dondurulması, həm də parlamentin və onun komitələrinin iclaslarının boykot edilməsinə razılaşmışıq", - cümə axşamı Trend -a "Qarabağ və Respublika Uğrunda Hərəkat"da təmsil olunan Ümid Partiyasının sədri, millət vəkili İqbal Ağazadə bildirib.
Trend -un arayışı: "Qarabağ və Respublika Uğrunda Hərəkat"da təmsil olunan Müsavat Partiyası bir müddət əvvəl hərəkat üzvü olan Ümid Partiyasının seçki komissiyalarında təmsil olunan bütün üzvlərini geri çağırmağı tələb kimi irəli sürüb. Ümid Partiyasının sədri, millət vəkili İqbal Ağazadə isə Müsavat deputat qrupunun üzvlərinin mandatdan imtina edəcəyi təqdirdə şərtə əməl edəcəyini bildirib. Hər iki partiya qarşılıqlı irəli sürülən tələbləri yerinə yetirməyə razılaşmadıqları üçün hərəkat daxilində ciddi böhran yaranıb.
Hərəkatda təmsil olunan Azərbaycan Liberal Partiyası isə böhranın həlli üçün Ümid Partiyasının seçki komissiyalarındakı üzvlərinin fəaliyyətini müvəqqəti dayandırmasını və bu partiyanın sədri İqbal Ağazadə ilə yanaşı Müsavat deputat qrupu üzvlərinin Milli Məclisin və komitələrin iclaslarıni seçki komissiyaları yenidən formalaşdırılana qədər boykot etmələrini təklif edib.
Azərbaycanda bələdiyyə seçkisinin 2009-cu il dekabrında keçirilməsi nəzərdə tutulur. Bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
Azərbaycanda bələdiyyələrin birləşdirilməsi prosesi nəticəsində onların sayı 2760-dan 1718-ə qədər enib.
"Qarabağ və Respublika Uğrunda Hərəkat"ı Azərbaycan Xalq Cəbhəsi, Vətəndaş və İnkişaf, Liberal, Demokrat, Müsavat və Ümid partiyaları 2009-cu il martın 18-də Konstitusiyaya təklif olunan əlavə və dəyişikliklərlə bağlı keçirilən referendum ərəfəsi təsis ediblər
Məqalə müəllifi ilə əlaqə ünvanı: [email protected]
