Azərbaycan, Bakı, 21 oktyabr / Trend , müxbir A..Hüseynbala/
Azərbaycanın müxalifət partiyasının sədri Dağlıq Qarabağ problemi ilə bağlı Milli Müqavimət Hərəkatının yaradılmasına ehtiyac olmadığını düşünür.
"Hakimiyyət ölkədəki real siyasi qüvvələrlə bir yerdə Azərbaycan xalqının ümumi mövqeyini müəyyən edən bir konsepsiya hazırlanmalıdır", - çərşənbə günü Trend -a Azərbaycan Demokrat Partiyasının (ADP) sədri Sərdar Cəlaloğlu bildirib.
Trend -un arayışı: Azərbaycanın müxalifət "Müsavat" deputat qrupunun üzvü Pənah Hüseyn oktyabrın 20-də Dağlıq Qarabağ münaqişəsinin nizamlanması ilə bağlı yaranan indiki situasiyaya görə Milli Müqavimət Hərəkatının yaradılacağını bəyan edib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik 7 rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk Qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır
Cəlaloğlunun sözlərinə görə, Dağlıq Qarabağ münaqişəsinin Azərbaycanın ərazi bütövlüyünün təmin olunması prinsipinə uyğun həlli üçün bütün xalqın müqavimətinə ehtiyac var. "Biz 1-2 milyonluq insanın iştirakı ilə ümumxalq aksiyası keçirməli və bütün dünyaya mövqeyimizi bir daha qəti şəkildə çatdırmalıyıq", - partiya sədri əlavə edib.
Onun fikrincə, həmin ümumi mövqeyimizi bəyan edəndən sonra hakimiyyət də buna uyğun xarici siyasətini aparmalıdır. "Dağlıq Qarabağ məsələsini oyuncağa çevirmək, müxalifətin, yaxud ayrılıqda iqtidarın maraq dairəsinə salmaq milli mənafelərimizə uyğun deyil. Bu, ümummilli problem olduğundan prosesdə bütün siyasi qüvvələr iştirak etməlidir", - Cəlaloğlu vurğulayıb.
Məqalə müəllifi ilə əlaqə ünvanı: [email protected]