Azərbaycan, Bakı, 30 noyabr/ Trend , müxbir M.Əliyev/
Azərbaycanın xarici işlər naziri Elmar Məmmədyarov 1-2 dekabr tarixlərində Yunanıstanın paytaxtında keçiriləcək ATƏT-in Xarici İşlər Nazirləri Şurasının illik iclasında iştirak etmək üçün bazar ertəsi axşam Afinaya yola düşüb.
Azərbaycanın xarici siyasət idarəsinin başçısı sabah ATƏT XİNŞ-nin iclasında çıxış etməyə hazırlaşır, XİN-in rəsmi nümayəndəsi Elxan Poluxov Trend -a deyib.
Günün ikinci yarısında Minsk Qrupu həmsədrlərinin iştirakı ilə Azərbaycan XİN rəhbərinin erməni həmkarı Edvard Nalbandyanla görüşü planlaşdırılıb. İlkin proqrama əsasən, görüşdə Minsk Qrupunun həmsədr dövlətlərinin - Rusiya, Fransa və ABŞ-ın XİN rəhbərlərinin də iştirakı gözlənilir.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır.1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk Qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
Azərbaycan XİN-in rəhbəri Afinada bir sıra ölkələrin xarici siyasət idarələrinin rəhbərləri ilə də ikitərəflli görüşlər keçirəcək, GÜAM xarici işlər nazirlərinin görüşündə iştirak edəcək.