Yunanıstan, Afina, 1 dekabr / Trend , E.Hüseynov/
ATƏT-in Parlament Assambleyasının Dağlıq Qarabağ üzrə xüsusi nümayəndəsi Qoran Lenmarker yanvarın sonu Azərbaycana səfər etməyi və regional məsələləri müzakirə etməyi planlaşdırır.
"Səfərin tarixi hələ dəqiqləşdirilməyib, bu, Ukraynadakı seçkilərin gedişindən asılı olacaq", - ATƏT XİNŞ iclası zamanı Lenmarker Afinadakı jurnalistlərə deyib.
Onun sözlərinə görə, bu regional səfər olacaq. "Biz Azərbaycan, Ermənistan və Gürcüstana səfər edəcək və həmin ölkələrin başçıları ilə ATƏT-lə əməkdaşlıq məsələlərini, həmçinin regional məsələləri müzakirə edəcəyik", - Lenmarker deyib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır.
1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk Qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.