Azərbaycan, Bakı, 12 fevral / Trend , müxbir Y.Ostapenko/
Avropa Parlamentinin tələbləri Türkiyəni qıcıqlandırırsa da bu, hələlik ölkənin Aİ-na daxil olmasına dair strateji kursunu dəyişməyəcək. Diplomatik oyun davam edir. Türkiyə siyasəti üzrə finlandiyalı ekspert İqor Torbakov belə hesab edir.
"Biz indi müşahidə edirik ki, bu, çətin diplomatik oyunun bir hissəsidir, - Torbakov Helsinkidən telefonla Trend -a deyib. - Avropa Parlamentinin məruzəsi və Türkiyənin qıcıqlanması o demək deyil ki, Türkiyə sonda daxil olma planlarından imtina edəcək".
Avropa Parlamenti çərşənbə günü Ankaranın Aİ-na daxil olması üzrə öhdəliklərini yerinə yetirməsini qiymətləndirən qətnamə qəbul edib. Avropa Parlamenti Türkiyədən Kiprin şimal hissəsindən qoşunlarını təcili çıxarmağı və Kipr nizamlanması üzrə danışıqların uğurla başa çatmasını təmin etmək üçün konkret tədbirlər görməyi tələb edib.
Türkiyənin rəsmi dairələri Avropa Parlamentinin qərarı barədə kəskin fikir bildiriblər. Türkiyənin Baş naziri məruzəni "qeyri-obyektiv və həqiqətə uyğun olmayan" adlandırıb.
Kipr Türkiyə və Avropa Parlamenti arasında maneə ola bilər. Finlandiyanın Beynəlxalq Əlaqələr İnstitutunun aparıcı elmi əməkdaşı Torbakov belə hesab edir.
"2004-cü ildə parçalanmış Kiprin bütöv olaraq Avropa İttifaqının tam hüquqlu üzvlüyünə qəbul edilməsi Brüsselin ən böyük strateji səhvi olub. Belə etməklə Brüssel özünü küncə sıxıb", - Torbakov deyib.
Cənubi Kiprin Adminstrasiyasının bu problemi həll etmək üçün heç bir marağı yoxdur. Çünki onlar artıq Aİ-dır. Digər tərəfdən Brüsselin də Kiprə təzyiq göstərmək üçün heç bir vasitəsi yoxdur. Çünki təzyiq mexanizmi - ölkənin Aİ-dan xaric edilməsi, üzvlüyün dayandırılması sadəcə olaraq yoxdur.
"Buna görə də Türkiyə yeganə ölkədir ki, ona təzyiq göstərmək olar. Çünki Türkiyənin Aİ-na daxil olmağa çox böyük marağı var", - Torbakov deyib.
Kipr 1974-cü ildə bölünüb. Hazırda adanın birləşdirilməsi üzrə danışıqlar gedir. Kiprin müəyyən edilməyən statusu və Türkiyənin yunan Kipri ilə nəqliyyatı açmaqdan imtina etməsi danışıqlar prosesini çətinləşdirən əsas səbəblərdəndir. Digər səbəblər arasında isə insan haqları sahəsindəki problemlər durur.
Hesab edilir ki, Türkiyənin Avropa İttifaqına daxil olması özü ilə bərabər qarşılıqlı iqtisadi fayda gətirəcək. Ankara Aİ-nın daxili bazarını genişləndirəcək. Türklərin ixtisas, təhsil və Avropanın kübar ənənə anlayışı ilə bağlı problemi yoxdur. Bu da əlavə müsbət cəhətdir.
