Azərbaycan, Bakı, 10 aprel /Trend, müxbir K.Zərbalıyeva/
Azərbaycan Fövqəladə Hallar Nazirliyi ölkənin şimal bölgəsində baş vermiş torpaq sürüşməsinin yağıntılarla bağlı olduğunu açıqlayıb.
Trend-in FHN-in rəsmi internet səhifəsinə istinadən yaydığı məlumata görə, respublikanın şimal bölgəsində torpaq sürüşməsinə meyilli sahələr 2010-cu il aprel ayının əvvəllərində yağıntılar nəticəsində fəallaşıb.
Nəticədə Qusar rayonu, Urva kəndində torpaq sürüşməsinin uzunluğu təxminən 100-120 metr, qırılma qaşının hündürlüyü 2,0-3,0 metr, sürüşmənin hərəkət istiqaməti yamac istiqamətində 100-150 metr aşağıya doğru çatlarla müşahidə olunur.
Quba rayonu, Güləzi kəndində isə sürüşmə sahələrinin uzunluğu 800-1000 metr, eni 250-300 metr, qırılma qaşının hündürlüyü 0,3-0,5 metr, əmələ gəlmiş çatların eni 0,5-1,0 metr, dərinliyi isə 1,0-2,0 metr təşkil edir.