Azərbaycan, Bakı, 23 aprel /Trend, müxbir A.Hüseynbala/
Azərbaycanın müxalifət partiyasının Məclis sədri deyib ki, partiyanın bəzi üzvləri namizədliklərini irəli sürəcəkləri dairələrlə bağlı qəti qərara gəlməyiblər.
"Partiya rəhbərliyi tərəfindən təklif olunub ki, namizədliklərini irəli sürmək istəyən hər bir kəs seçki dairəsini özü müəyyənləşdirsin", - cümə günü Trend-ə Müsavat Partiyası Məclisinin sədri Sülhəddin Əkbər bildirib.
Trend-in arayışı: Azərbaycanda parlament seçkilərinin 2010-cu ilin payızında keçiriləcəyi gözlənilir. Bundan əvvəlki seçkilər 2005-ci ilin noyabr ayında keçirilib. Azərbaycanda parlament seçkiləri majoritar sistem üzrə 125 seçki dairəsində keçirilir.
Məclis sədrinin sözlərinə görə, bəziləri artıq dairələri müəyyənləşdirib, bəziləri isə hələlik qərar verə bilməyiblər. "Divanın son iclasında bu prosesin bir qədər sürətləndirilməsi barədə tapşırıq verilib. Çünki biz ilk növbədə namizədlərimizi hansı dairədən irəli sürəcəyimizi müəyyənləşdirməliyik ki, sonra müttəfiqlərimizlə müzakirələr prosesində bunu nəzərə ala bilək", - Əkbər əlavə edib.
Onun fikrincə, özünün, başqan müavinlərinin, hansısa partiya üzvünün başqasının namizədliyinin irəli sürülməsi ilə bağlı təklif vermək imkanı var. "Rayon təşkilatı da hətta həmin rayondakı başqa bir partiya üzvünün, yaxud bitərəf şəxsin namizədliyinin dəstəklənməsinin daha məqsədəuyğun olduğu barədə təklif irəli sürə bilər", - partiya funksioneri vurğulayıb.
Məclis sədrinin özünün namizədliyinə gəldikdə, o deyib ki, üç dairə ətrafında düşünür, amma qəti qərar verməyib.
Müsavat Partiyası 1911-ci ilin oktyabrında Bakıda yaradılıb. Müsavat Partiyasının (Bərpa) Qurultayı 1992-ci il noyabrın 7-də Bakıda Respublika sarayında keçirilib. Gizli səsvermənin yekunları əsasında İsa Qəmbər əksəriyyət səslə Müsavat Partiyasının başqanı seçilib.
Qəmbər Аzərbаycan Pаrlаmеntinin еks-spikеri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Pаrtiyа 4 nəfər deputatla parlamentdə təmsil olunur.
