Azərbaycan, Bakı, 3 iyul /Trend, müxbir А.Qasımova/
ABŞ-ın sabiq dövlət katibi Kondoliza Rays dünya liderlərinin beşinci simpoziumu çərçivəsində sentyabrda Azərbaycana gələcək. Məlumatı World Leaders Travel rəsmi saytı yayıb. Simpozium çərçivəsində dünyanın tanınmış siyasətçiləri və ekspertləri Rusiya, Türkiyə, Gürcüstan, Ukrayna və Azərbaycana səfər edəcəklər.
Raysın səfəri ilə yanaşı, ölkəyə ABŞ-ın sabiq müdafiə naziri Uilyam Ceyms Perri və Karnegi Moskva mərkəzinin direktoru Dmitri Treninin də səfəri gözlənilir.
Moskvada başlayıb İstanbulda sona çatacaq səfər çərçivəsində hökumət və biznes cəmiyyətinin nümayəndələri ilə görüşlər keçiriləcək.
Bu proqram çərçivəsində Qara dəniz hövzəsi regionunda vəziyyətlə bağlı mühazirələr oxunacaq və diskussiyalar keçiriləcək.