Qazaxıstan, Astana, 19 iyul /Trend, müxbir S.Süleymanov/
Əfqanıstan üzrə beynəlxalq konfrans iyulun 20-də Kabildə öz işinə başlayacaq. Bu barədə Trend-ə Qazaxıstan XİN-in mətbuat katibi İlyas Ömərov bildirib.
Onun sözlərinə görə, konfrans zamanı təhlükəsizlik, inkişaf, regional əməkdaşlıq, barışıq və reinterqasiya məsələləri müzakirə olunacaq.
"Konfrans iştirakçıları hərbi əməliyyatların aparılması üzrə məsuliyyətin Əfqanıstan təhlükəsizlik qüvvələrinə verilməsi ilə bağlı məsələlərə xüsusi diqqət ayıracaqlar", - Ömərov deyib.
Onun sözlərinə görə, əfqan tərəfi konfransda təqdim olunacaq milli təhlükəsizlik proqramı və strategiyasının reallaşdırılmasına dəstək göstərilməsi xahişi ilə beynəlxalq birliyə müraciət etmək niyyətindədir.
"Konfransda həmçinin əsas sahələrdə (kənd təsərrüfatı, təhsil, dağ sənayesi, energetika və nəqliyyat infrastrukturu) sosial-iqtisadi vəziyyətin yaxşılaşdırılması üzrə 14 kompleks milli proqram da təqdim olunacaq", - Ömərov əlavə edib.
Bununla yanaşı, onun sözlərinə görə, konfrans iştirakçıları terrorizm, ekstremizm, narkotiklərin qanunsuz dövriyyəsi və mütəşəkkil cinayətkarlıqla bağlı olan, eləcə də Əfqanıstanın və bütün regionun maraqlarına toxunan problemlərin həllində Əfqanıstanla qonşu olan dövlətlərin region dövlətləri ilə əməkdaşlığının genişləndirilməsi imkanlarını da müzakirə edəcəklər.
"Konfrans iştirakçıları 2010-cu il iyunun 2-4-də Kabildə Əfqanıstan Ağsaqqallar Şurasının yekunları barədə də məlumatlandırılacaqlar", - XİN-in mətbuat katibi bildirib. - "Beynəlxalq birliyin Əfqanıstanın sülh və barışıq üzrə fonduna maliyyə ödəmələri vasitəsilə bu ölkənin barışıq və reinteqrasiya səylərinin dəstəklənəcəyi gözlənilir".
Onun sözlərinə görə, konfransın işində digər əsas istiqamət korrupsiya ilə mübarizənin gücləndirilməsi olacaq.
Kabildəki konfransa 70-dən artıq ölkənin, beynəlxalq və regional təşkilatların, eləcə də maliyyə institutlarının nümayəndələri dəvət olunublar.
