Azərbaycan, Bakı, 3 avqust /Trend, müxbir D.Xatınoğlu /
Əfqanıstan Prezidenti Həmid Kərzai yaxın günlərdə İrana səfər edəcək. Bunu Trend-ə Əfqanıstan Prezidenti Aparatının sözçüsü Siyamək Herəvi çərşənbə axşamı Kabildən deyib.
Herəvi əlavə edib ki, İran, Tacikistan və Əfqanıstan - üç farsdilli ölkə prezidentlərinin zirvə toplantısı 10 gündən sonra Tehranda keçiriləcək və Kərzai bu konfransda iştirak etmək məqsədilə bu ölkəyə səfər edir.
"Tehranda keçiriləcək zirvə toplantısında İran, Əfqanıstan və Tacikistan arasında iqtisadi, siyasi əlaqələrin inkişaf etdirilməsi, üç ölkə arasında ticarət mübadiləsinin artırılması, regionda mövcud olan terrorizm, narkotik qaçaqmalçılığı kimi problemlərin həll yolları müzakirə olunacaq", - Herəvi deyib.
Bundan öncə üç farsdilli ölkə prezidentinin zirvə toplantısı 2008-ci ilin avqustun 28-də Tacikistanda keçirilib.