Azərbaycan, Bakı, 20 avqust /Trend, müxbir S.Süleymanov/
Astananın quru iqlimi nəzərə alınmaqla ilk dəfə olaraq 10 min nəfərlik unikal üstüörtülü yaşayış kompleksinin tikintisi planlaşdırılır. Bu barədə Ak-Ordı mətbuat xidməti xəbər verir.
"Tezliklə üstülüörtülü kompleks Astanada ən unikal tikili olacaq. Nəhəng günbəz altında tam infrastruktura malik mikrorayon yerləşdiriləcək. Bütün il ərzində bu kompleksdə eyni temperatur olacaq. Layihə 10 min nəfər üçün nəzərdə tutulub", - dövlət başçısının mətbuat xidmətinin məlumatında deyilir.
Dövlət başçısı Nursultan Nazarbayev komplekslə elmi-tədqiqat institutuna baş çəkərkən tanış olub. Burada ona Astana şəhərinin baş inkişaf planı təqdim olunub.
"Burada şəhərin gələcək inkişaf məsələləri müzakirə olunub. Prezidentə şəhərdəki yeni obyektlərin, media mərkəzinin, məktəblilərin yaradıcılıq sarayının, Qazaxıstan Tarix Muzeyinin layihələri də təqdim olunub", - məlumatda deyilir.
Yeni media mərkəzində regionda ən böyük, müasir tələblərə cavab verən televiziya kompleksi yerləşdiriləcək. Ümumi sahəsi 45 min kvadratmetrdən çox olan Məktəblilərin yaradıcılıq sarayı planetarilərlə təchiz ediləcək; burada muzey, kitabxana, idman və xoreoqrafiya zalları və s. fəaliyyət göstərəcək.
Qazaxıstan Tarix Muzeyi "Qazax Eli" abidəsi yaxınlığındakı yeni meydanda tikiləcək. Binanın layihəsi qazax milli koloriti nəzərə alınmaqla modern üslubda hazırlanıb.