Azərbaycan, Bakı, 13 sentyabr /Trend, müxbir M.Əliyev/
Son günlər Ermənistanın xüsusi xidmət orqanlarına məxsus kəşfiyyat qrupları təmas xəttində təxribat məqsədilə əməliyyatlar keçirməyə cəhd etsələr də, qarşıları qətiyyətlə alınıb.
Müdafiə Nazirliyinin mətbuat xidmətindən bazar ertəsi Trend-ə bildiriblər ki, sentyabrın 11-də təxminən saat 17:00-da cəbhənin şimal-qərb istiqamətində bir neçə nəfərdən ibarət erməni təxribat qrupunun növbəti hiyləsi də dəf edilib.
Təxribatçılar əməliyyatlarının baş tutmadığını görüb qaçmağa başlasalar da, onlardan biri ələ keçib. Kəşfiyyatçıya aid olan bir sıra ləvazimatlarla birlikdə Manvel Mamikonoviç Sarıbekyan saxlanılıb.
Onunla aparılan ilkin söhbət nəticəsində aydınlaşıb ki, Manvel Sarıbekyanın Azərbaycanın nəzarət etdiyi ərazilərə soxulmaq istəyi Ermənistan xüsusi xidmət orqanlarının təxribat törətmək tapşırığı əsasında olub. Hazırda təxribatın detalları üzərində araşdırma aparılır.