Azərbaycan, Bakı, 15 oktyabr /Trend, müxbir S.Süleymanov/
Bu il Qazaxıstanda yetkinlik yaşına çatmayanlara qarşı cinsixarakterli 80 hal qeydə alınıb. Bu barədə ölkənin "Yeddi" telekanalı Baş Prokurorluğa istinadən məlumat yayıb.
"Baş Prokurorluğun məlumatına görə, yalnız bu il yetkinlik yaşına çatmayanlara qarşı cinsixarakterli 80-dən artıq hal qeydə alınıb. Bu işlərin, demək olar, yarısının üstü açılıb. 10-a yaxın iş isə günahkarın müəyyən edilməməsi səbəbindən dayandırılıb", - telekanal xəbər verir.
"Azyaşlıların yoldan çıxarılması" maddəsi üzrə statistika da oxşardır.
"9 ay ərzində otuza yaxın hadisə baş verib. Ust-Kameneqorskda polis indiyədək binaların qaranlıq girişlərində məktəblilərə hücum edən cinayətkarı axtarır", - xəbərlər buraxılışında bildirilir.
Respublika Senatı yetkinlik yaşına çatmayanların zorlanmasına görə cəzanın sərtləşdirilməsini nəzərdə tutan qanun layihəsini yenidən işlənmək üçün geri qaytarıb.
"Yeddi" telekanalının verdiyi məlumata görə, senator Qəni Qasımov şəxsən sənədə 8 düzəliş edib. O, pedofiliyaya görə həbsdə yatmış adamlara məktəblərdə və uşaq evlərində işləməyin həmişəlik qadağan edilməsi barədə yeganə düzgün qərar təklif edir. Bu zaman qanun layihəsində pedofiliyaya görə 10 ildən 20 ilədək cəza müddəti nəzərdə tutulur.
"Buna görə güllələnmə olub. İndi Avropada belə adamların axtalanması üzrə qanunvericilik normaları hazırlanır. Biz isə bunu görür və onlara şans veririk", - senator Qasımov bildirib.
