Azərbaycan, Bakı, 22 oktyabr /Trend, müxbir K.Zərbalıyeva/
Azərbaycanda fəaliyyət göstərən bəzi şirkətlər xaricdən mütəxəssis gətirərkən sui-istifadə hallarına cəhd edir, - Trend-in məlumatına görə, Dövlət Miqrasiya Xidmətinin rəisi Arzu Rəhimov jurnalistlərə müsahibəsində bu barədə məlumat verib.
"Şirkətlərin xaricdən dəvət etdiyi mütəxəssislər yüksək səviyyəli, peşəkar, təcrübəli olmalıdır. Lakin şirkətlər 1988-1990-cı il təvəllüdlü gəncləri yüksək səviyyəli mütəxəssis kimi ölkəyə dəvət edirlər. Yaxud da 1960-1965-ci il təvəllüdlü, indiyədək heç bir yerdə işləməyən şəxsi mütəxəssis adı ilə dəvət edirlər. Əgər həmin şəxs indiyədək işləməyibdisə, o, necə yüksək səviyyəli mütəxəssis ola bilər? Bizim xidmətə bu məsələ ilə bağlı qeyri-dürüst məlumatlar verildiyi halda, biz həmin şəxslərlə bağlı imtina qərarları veririk" , - Rəhimov deyib.
DMX rəsmisi deyir ki, bəzi şirkətlər satış meneceri işləmək üçün xaricdən işçi gətirməyə cəhd göstərirlər. Bu halda DMX həmin şirkətlərə satış menecerinin Azərbaycan vətəndaşları sırasından seçilməsini təklif edir.
"Azərbaycanda satış meneceri kifayət qədərdir. Biz şirkətlərə izah etməyə çalışırıq ki, satış menecerini Azərbaycan vətəndaşları sırasından seçib işə qəbul etsinlər. Bizimlə razılaşan şirkətlər var. Onlar Azərbaycan vətəndaşlarını işə qəbul edir, xaricə göndərib iş təcrübəsini artırır və onların təcrübəsindən yararlanırlar", - Rəhimov deyib.
Azərbaycanın daxili əmək bazarında, ilk növbədə, ölkə vətəndaşlarının işlə təmin olunmasını vacib sayan Rəhimovun sözlərinə görə, ötən illərdən fərqli olaraq indi Azərbaycanda fəaliyyət göstərən bir çox böyük xarici şirkətlərdə çalışan ölkə vətəndaşlarının sayı üstünlük təşkil edir.
Xidmət rəisinin sözlərinə görə, Azərbaycan ərazisində əcnəbilərin əmək fəaliyyəti ilə məşğul olmaları üçün onu işə qəbul edən şirkət tərəfindən 1 000 manat dövlət rüsumu ödənilir və ona əmək fəaliyyəti ilə məşğul olmaq üçün 1 il müddətinə fərdi icazə verilir. Fərdi icazənin müddəti isə 4 dəfəyədək artırıla bilər. Bu icazə əsasında həmin əcnəbiyə müvəqqəti yaşamaq üçün icazə verilir və o, yaşayış yeri üzrə qeydə alınır.