Azərbaycan, Bakı, 2 noyabr /Trend, müxbir S.Ağayeva/
Litva Seyminin (parlament) nümayəndə heyəti Bakıda ikitərəfli əməkdaşlıq perspektivlərini müzakirə edəcək. Seymin Beynəlxalq münasibətlər üzrə komitəsinin rəhbəri Emanuelis Zingerisin başçılığı ilə nümayəndə heyəti noyabrın 23-də Azərbaycana gələcək. Bu barədə çərşənbə axşamı Trend-ə Litvanın Azərbaycandakı səfiri Kyastutis Kudzmanas məlumat verib.
Səfər zamanı nümayəndə heyətinin Azərbaycan Milli Məclisində və bir sıra dövlət qurumlarında iki ölkə arasında gələcək əməkdaşlığı müzakirə etmək üçün görüşləri planlaşdırılır.
Litva Azərbaycana Avropa İttifaqının "Şərq tərəfdaşlığı" proqramı çərçivəsində Aİ-nin standartları nəzərə alınmaqla, qanunvericilik aktlarının unifikasiyası (vahid şəkləsalınma) məqsədilə kömək edir.
İkiillik layihə keçən ilin sentyabrından həyata keçirilir.
Litva Seyminin dəstəyi ilə həyata keçirilən Tvininq layihəsinin başlıca məqsədi Azərbaycanda demokratiyanın və qanunun aliliyinin möhkəmələnməsinə töhfə vermək, xüsusən respublika qanunvericiliyinin Aİ-nin qanunvericiliyinə yaxınlaşdırılmasına kömək göstərməkdir.
"Şərq tərəfdaşlığı" Polşa və İsveçin təşəbbüsü ilə qonşuluq siyasəti çərçivəsində Aİ-nin altı post sovet respublikası - Azərbaycan, Ermənistan, Gürcüstan, Moldova, Belarus və Ukrayna ilə münasibətlərinin yaxşılaşdırılmasına yönəldilib. Layihə çərçivəsində Aİ tərəfindən göstərilən ölkələrə 2013-cü ilədək dövlət institutlarının möhkəmlənməsi, sərhədlərə nəzarət və kiçik şirkətlərə köməyin göstərilməsi üçün müəyyən edilən 600 milyon avronun ayrılması nəzərdə tutulub. "Şərq tərəfdaşlığı"nın təsis sammiti 2008-ci il mayın 7-də Praqada baş tutub.
