Azərbaycan, Bakı, 18 noyabr /Trend, müxbir T.Hacıyev/
Azərbaycanın müxalif Müsavat Partiyasının Nizamnaməsinə əsasən, Müsavat Partiyası heç bir partiya ilə birləşə bilməz. Bu barədə cümə axşamı Trend-ə Müsavat Partiyasının Məclis sədri Sülhəddin Əkbər bildirib.
"Nizamnaməyə əsasən, Müsavata birləşmək istəyən partiya birləşmə qərarı verir və son qərar Müsavatın qurultayında verilir. Ancaq Müsavat Məclisi müsbət qərar verərsə, biz birbaşa birləşdrici qurultaya gedə bilərik. Əgər Müsavat Məclisi qərar versə ki, AXCP-nin Müsavata birləşməsinə etiraz etmir və hadisəni təqdir edir, o zaman birləşdirici qurultay çağırıla bilər və qurultayın müsbət qərarından sonra qalan məsələlər birgə davam etdirilə bilər", - Əkbər əlavə edib.
İyulun 15-də AXCP-nin yaranmasının 21 illiyinə həsr olunmuş tədbirdə Müsavat başqanı İsa Qəmbər Rəsulzadə-Elçibəy yolunda olan siyasi partiyaların birləşməsini təklif edib. Bu təklifə ilk reaksiya AXCP-dən gəlib. AXCP-nin sentyabrın 25-də keçirilən qurultayı zamanı Müsavat Partiyasına birləşmək haqqında qərar qəbul olunub.
Onun sözlərinə görə, Müsavat Divanında artıq birləşmə məsələsinin müzakirəsinə başlanılıb. Divanın noyabrın 22-də keçiriləcək müzakirələrindən sonra Məclis çağırılmalıdır və Müsavat Partiyasının münasibətini bildirən qərar verilməlidir.
Əkbər AXCP-Müsavat birliyinin tərəfdarı olduğunu deyib.
"Mən bu birliyin və Azərbaycanda xalq hərəkatı ideyasının tərəfdarıyam. Azərbaycanda xalq hərəkatını bu iki partiyanın yarada biləcəyinə inanıram. Azərbaycanın demokratik qüvvələri mobilizasiya olunmalıdır. Bunun üçün isə demokratik qüvvələrin avanqardı sayılan AXCP və Müsavat partiyaları birləşməlidir. Bundan başqa, demokratik hərəkatdan çıxan digər demokratik qüvvələr də bu birliyə qoşula bilərlər", - Əkbər vurğulayıb.
Müsavat Partiyası 1911-ci ilin oktyabrında Bakıda yaradılıb. 1920-ci ilin aprelində Azərbaycan Sovet qoşunları tərəfindən işğal olunduqdan sonra Müsavat Partiyasının fəaliyyəti məhdudlaşıb və gizli fəaliyyət göstərməyə başlayıb.
1992-ci ilin noyabrında Müsavat Partiyasının III Bərpa Qurultayı keçirilib. Partiya ideologiyasının əsasında müsavatçılıq, türkçülük, müasirlik liberallıq ideyaları dayanır. Siyasi sistemdə mövqeyi sağ-mərkəzçidir.
Azərbaycan Xalq Cəbhəsi Azərbaycan Milli Azadlıq Hərəkatı zamanı gizli şəkildə 1989-cu ildə təsis olunub. Partiya kimi 1995-ci ildə qeydiyyatdan keçib. AXCP-nin ideologiyasının əsasında müsavatçılıq, demokratiya, millətçilik durur. Siyasi sistemdə sağ mövqeyi təmsil edir.
