Azərbaycan, Bakı, 23 noyabr /Trend, müxbir T.Cəfərov/
İran Parlamentinin Təhlükəsizlik Komissiyasının sədr müavini İsmail Kövsəri Avropa İttifaqının xarici məsələlər üzrə ali nümayəndəsi Ketrin Eştonun son açıqlamasına münasibət bildirib və belə açıqlamaların müzakirələrin daha da mürəkkəbləşməsinə səbəb olacağını deyib. "İran nüvə fəaliyyətlərini sülhyönlü aparır, heç vaxt bu fəaliyyətlərin hərbi istiqamətlərdə aparılmasının tərəfdarı olmayıb, olmayacaq da. Ketrin Eştonun çıxışının müzakirələrin daha da mürəkkəbləşməsinə səbəb olmaqdan başqa heç bir dəyəri yoxdur", - Kövsəri çərşənbə axşamı Tehrandan telefonla Trend-ə bildirb.
Beynəlxalq KİV-in məlumatına əsasən, Avropa Birliyinin xarici siyasət üzrə ali komissarı Ketrin Eşton deyib ki, İran və 5+1 qrup ölkələri (BMT TŞ-nin beş daimi üzvü - Çin, Böyük Britaniya, Frnasa, Rusiya, ABŞ və Almaniya) arasında müzakirələr əsasən İranın nüvə proqramının hərbi istiqaməti ilə bağlı aparılacaq və bu sahədə məsələlər açıq formada müzakirəyə çıxarılacaq. Xanım Eşton əlavə edib ki, 5+1 ölkələri və İran arasında müzakirələrin dekabrın 5-də Cenevrədə keçirilməsi planlaşdırılır.
Kövsəri Qərb ölkələri rəsmilərinin belə açıqlamalarını psixoloji müharibə aparmaq məqsədi ilə səsləndirdiyini düşünür. "Qərb ölkələri rəsmiləri bu cür açıqlamalar verməklə İrana qarşı pisxoloji müharibə aparır və müzakirələrdə mövcud məsələlərin həllində maraqlı olmadıqlarını nümayiş etdirirlər", - Kövsəri deyib.
İran rəsmisi Eştonun dünyadakı mövcud problemlərin həllinə kömək göstərməsinə şübhə ilə yanaşıb. "Mən xanım Eştonun həqiqətən mövcud problemlərin həllinə çalışmasına inanmıram. Ona görə ki, həqiqətən belə olsaydı, sionist rejimindəki 250-ə yaxın nüvə başlığı və ABŞ-dakı 10 min nüvə başlığının məhvi üçün çalışardı. Lakin bu, belə deyil", - Kövsəri deyib.
İranla danışıqlarda Ketrin Eştonun təmsil etdiyi "altılıq" ölkələri keçən həftə danışıqların dekabrın 5-də İsveçrənin Cenevrə şəhərində keçirilməsini razılaşdırıblar. İran isə müzakirələrin Türkiyədə keçirilməsinin tərəfdarıdır.
ABŞ və bir sıra Qərb dövlətləri İranı sülhyönlü atom proqramı pərdəsi altında hərbi məqsədlərlə nüvə silahının hazırlanmasında ittiham edir. Tehran bütün ittihamları təkzib edir və bəyan edir ki, NSYM-in (Nüvə Silahının Yayılmaması üzrə Müqavilə) üzvü kimi sülh məqsədlərlə nüvə texnologiyalarından istifadə etməyə tam hüququ var.
İndiyədək BMT TŞ İranın nüvə proqramını dayandırması üçün altı qətnamə qəbul edib, onlardan dördü İran əleyhinə iqtisadi və bəzi siyasi sanksiyaları nəzərdə tutur, ikisi xəbərdarlğı ehtiva edir.
9 iyunda BMT TŞ Tehran barəsində onun uranın zənginləşdirilməsi üzrə işləri dayandırmaqdan imtina etməsi ilə əlaqədar daha kəskin sanksiyaları nəzərdə tutan yeni qətnamənin qəbuluna səs verib.
