Azərbaycan, Bakı, 1 dekabr /Trend, müxbir T.Hacıyev/
Azərbaycanın müxalif Müsavat Partiyasındakı istefalar müxalifətdə yeni yaranan tendensiyaların göstərisidir. Bu barədə çərşənbə günü Trend-ə Azərbaycan Xalq Cəbhəsi Partiyası (AXCP) sədrinin siyasi məsələlər üzrə müavini Nurəddin Məmmədli bildirib.
"Müsavatdan bu cür istefaların edilməsi bütövlükdə müxalifət üçün bir tendensiyanın göstəricisidir. AXCP ilə Müsavatın birləşməsini gözlədiyimiz bir vaxtda məlum olur ki, Müsavat daxilində bu birləşmənin əleyhdarı olan qüvvələrin mövcudluğu partiyadan istefalara səbəb olur. Hər halda birləşmənin tərəfdarıyıq və bunu qurultayımızın qərarı ilə təsdiq etmişik", - Məmmədli əlavə edib.
Noyabrın 29-da Müsavat Partiyasının Məclis sədri Sülhəddin Əkbər tutduğu vəzifədən, Divan üzvü İbrahim İbrahimli isə partiya sıralarından istefa verib. Əkbər bu hərəkətini partiyanın strateji kursu ilə razılaşmamağı ilə əlaqələndirib. İbrahimli isə partiya rəhbərliyinin ona etimad göstərmədiyini əsas gətirərək partiya sıralarını tərk edib.
Hər iki siyasətçinin noyabrın 30-da yaydığı birgə bəyanatda qeyd olunub ki, istefa vermələrinə səbəb Müsavatın daxilində bəzi qüvvələrin AXCP-Müsavat birliyinə mane olmasıdır.
AXCP funksioneri ümid etdiyini bildirib ki, Əkbər və İbrahimli aktiv siyasətdən uzaqlaşmayacaqlar.
"Uzun sürən mübarizə tariximizdə hər iki şəxs özünü təsdiq etmiş, bütün varlığı ilə Azərbaycan dövlətçiliyinə bağlı adamlardır. Ona görə də mən hesab edirəm ki, onlar hansısa formada öz siyasi fəaliyyətlərini davam etdirməlidirlər. Belə insanları itirmək olmaz", - Məmmədli qeyd edib.
O, bildirib ki, Müsavat daxilində birliyə qarşı olan insanların olub-olmamasını zaman göstərəcək. "Müsavat daxilində AXCP ilə birləşməyin əleyhdarlarının olduğu zamanla üzə çıxacaq. Birləşmə sosial sifarişdir. Bu proseslərin normal sonluqla nəticələnəcəyi ilə bağlı inamımı itirmək istəmirəm", - Məmmədli deyib.
İyulun 15-də AXCP-nin yaranmasının 21 illiyinə həsr olunmuş tədbirdə Müsavat başqanı İsa Qəmbər Rəsulzadə-Elçibəy yolunda olan siyasi partiyaların birləşməsini təklif edib. Bu təklifə ilk reaksiya AXCP-dən gəlib. AXCP-nin sentyabrın 25-də keçirilən qurultayı zamanı Müsavat partiyası ilə birləşmək haqqında qərar qəbul olunub.