Təfərrüatlar əlavə olunub (ilk xəbər 10:50-də yayılıb )
Azərbaycan, Bakı, 28 yanvar /Trend, müxbir Y.Ostapenko/
ABŞ-ın Azərbaycana yeni təyin edilən səfiri Metyu Brayza Vaşinqtonda and içib. Bu barədə Trend-ə ABŞ-ın Azərbaycandakı səfirinin mətbuat katibi Kis Bin məlumat verib.
Andiçmə mərasimində Azərbaycanın ABŞ-dakı səfiri Yaşar Əliyev də iştirak edib.
Binin sözlərinə görə, eyni zamanda, Ağ Ev Metyu Brayzanın namizədliyini yenidən ABŞ Senatına səsvermə üçün göndərib.
Binin sözlərinə görə, bu, o deməkdir ki, Brayza ABŞ Prezidenti Barak Obama tərəfindən təyin olunduğu andan Senatın növbəti sessiyasına qədər (2011-ci ilin dekabrınadək) ABŞ-ın Azərbaycanda səfiri olacaq.
Senat yaxın dinləmədə onun namizədliyini bəyənərsə, Brayza Azərbaycandakı diplomatik missiyaya üç il rəhbərlik edəcək, Bin deyib.
"Səfirin namizədliyi Senata göndərilib, çünki Obama səfirin ənənəvi təyinolunma prosedurunda maraqlıdır", - Bin deyib.
Bundan əvvəl məlumat verildiyi kimi, Brayzanın fevralın ilk günlərində Azərbaycana gəlməsi gözlənilir.
Amerikanın Azərbaycandakı diplomatik nümayəndəliyinin rəhbəri vəzifəsi 2009-cu ilin iyulundan - keçmiş səfir Enn Dersinin səlahiyyət müddəti bitdiyi andan boş qalıb.