Azərbaycan, Bakı, 24 mart /Trend, müxbir S.Ağayeva/
Qazaxıstanda prezident seçkiləri günü bu ölkənin Azərbaycanda müvəqqəti yaşayan vətəndaşları Qazaxıstanın Bakıdakı diplomatik missiyası yanında yaradılan seçki məntəqəsində səs verə bilərlər. Bu barədə cümə axşamı Trend-ə Qazaxıstanın Azərbaycandakı səfirliyinin birinci katibi Yerlan Abışev məlumat verib.
Aprelin 3-də Qazaxıstanda prezident seçkiləri keçiriləcək.
Azərbaycan Respublikası ərazisində yaşayan və ya olan Qazaxıstan vətəndaşları Qazaxıstan Respublikasının Azərbaycandakı səfirliyindəki 140 saylı seçki məntəqəsində yerli vaxtla saat 09:00-dan 20:00-dək səs verə bilərlər. Ünvan: Bakı şəhəri, Həsən Əliyev küçəsi, keçid 15, ev 8.
Qazaxıstan vətəndaşlığını təsdiqləyən sənədin olması vacibdir.
Diplomat bildirib ki, Qazaxıstanın Azərbaycandakı səfirliyində bu ölkənin 200-ə yaxın vətəndaşı konsul uçotundadır.
Qazaxıstan Prezidenti Nursultan Nazarbayev fevralın əvvəlində "QR-da növbədənkənar prezident seçkilərinin keçirilməsi haqqında" sərəncam imzalayıb. Həmin sərəncama əsasən, növbədənkənar prezident seçiləri 2011-ci il aprelin 3-də keçiriləcək.
Respublika rəhbəri postuna dörd nəfər namizəddir: hazırkı dövlət başçısı Nursultan Nazarbayev, kommunist Jambıl Ahmetbekov, vətənpərvərlər partiyasının lideri Qani Kasımov və "Tabiqat" ekeoloji birliyinin lideri Mels Yeleusizov.