Azərbaycan, Bakı, 5 avqust /Trend/
Azərbaycan Prezidenti İlham Əliyev Rusiya Prezidenti Dmitri Medvedevin dəvəti ilə avqustun 9-da Soçiyə işgüzar səfərə gedəcək. Trend-in məlumatına görə, bu barədə Kremlin mətbuat xidməti məlumat yayıb.
Azərbaycan və Rusiya prezidentlərinin bundan əvvəlki görüşü iyunun 24-də Kazanda baş tutub. Görüşdə prezidentlər İlham Əliyev, Dmitri Medvedev və Serj Sarkisyan Dağlıq Qarabağ nizamlamasının əsas prinsiplərini müzakirə ediblər.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.