Azərbaycan, Bakı, 19 may /Trend, müxbir V.Javoronkova/
Özbəkistan Azərbaycan ilə hərtərəfli əməkdaşlığın möhkəmləndirilməsinə daim xüsusi əhəmiyyət verib və verir. Özbəkistanın Azərbaycanda yeni təyin olunmuş fövqəladə və səlahiyyətli səfiri Şerzod Fayziyev belə hesab edir.
"Azərbaycan Özbəkistan üçün artan geosiyasi və iqtisadi əhəmiyyət kəsb edən Cənubi Qafqaz regionunda əsas tərəfdaşdır", - diplomat Trend-ə müsahibəsində deyib.
Onun sözlərinə görə, zaman Özbəkistan-Azərbaycan münasibətlərinin böyük perspektivləri olduğunu və regionlarımızda uzunmüddətli sabitlik və davamlı inkişafın dəstəklənməsində mühüm rol oynaya biləcəyini göstərdi.
"Ölkələrimiz arasında münasibətlər dərin tarixi köklərə, milli adət və ənənələrin, dilin, mədəniyyətin və dinin ümumiliyinə və yaxınlığına əsaslanır", - səfir deyib.
Fayziyevin sözlərinə görə, bu münasibətlər aydın qeyd edilmiş strateji prioritetlərə və oriyentirlərə malikdir ki, bu da öz növbəsində, artıq yeni müasir şəraitlərdə qarşılıqlı etimad və qarşılıqlı yardım əsasında uzunmüddətli əməkdaşlığın qurulması üçün tamamilə əlverişli və nadir imkan yaradır.
"Özbəkistan həmişə Dağlıq Qarabağ münaqişəsinin dinc yolla həllinə tərəfdar olub və tərəfdar olmaqda davam edir və hesab edir ki, nizamlanmanın əsas şərtlərindən biri Azərbaycanın ərazi bütövlüyünün təmin edilməsi olmalıdır", - diplomat qeyd edib.
Onun sözlərinə görə, Daşkənd Özbəkistanın Mərkəzi Asiyanın aktual regional problemlərinə yanaşmasında və praktiki addımlarında Azərbaycan tərəfinin həmrəyliyini və dəstəyini yüksək qiymətləndirir.
"Bizi, xüsusilə, belə bir fakt sevindirir ki, son illərdə Özbəkistanla Azərbaycan arasında münasibətlər strateji tərəfdaşlıq səviyyəsinədək qalxıb", - diplomat bildirib.
Onun fikrincə, iki ölkə arasında baxış dairəsi xaricində qalan heç bir sahə yoxdur.
Diplomat qeyd edir ki, şübhəsiz, Özbəkistan və Azərbaycan liderləri arasındakı sıx və etibarlı dialoq dövlətlərarası münasibətlərin belə yüksək səviyyəyə çatmasına imkan verən əsas amildir və iki dövlət başçısının müntəzəm görüşləri xoş ənənəyə çevrilib.
Fayziyev əmindir ki, Özbəkistanla Azərbaycan arasındakı qarşılıqlı münasibətlərin hazırkı səviyyəsi bütün mövcud imkanları tükətməyib, əksinə, hələ reallaşdırılmamış daha böyük potensial mövcuddur.
"Bununla əlaqədar, indi biz bu təmasların daha yüksək səviyyələrdə davam etdirilməsi üzərində çalışırıq", - o deyib.
İqtisadi əməkdaşlıq
Ticari-iqtisadi və investisiya əlaqələrinin genişləndirilməsi Özbəkistan və Azərbaycan arasında əməkdaşlığın prioritet istiqamətidir.
Fayziyevin fikrincə, hazırkı mürəkkəb şəraitdə, o cümlədən qlobal böhranın sərt nəticələrinin qaldığı bir vaxtda birgə fəaliyyət proqramının müəyyən edilməsi, iki ölkənin müəssisə və şirkətləri arasında kooperasiya əlaqələrinin möhkəmləndirilməsi, qarşılıqlı mal dövriyyəsinin əldə olunmuş templərinin gələcəkdə artırılması son dərəcə vacibdir.
Onun sözlərinə görə, bununla əlaqədar bu gün Daşkəndin səyləri ticari-iqtisadi və investisiya mübadiləsi sahəsində iki ölkə arasında qarşılıqlı fəaliyyətin irəliləməsi yollarının aşkar edilməsinə yönəlib.
"Bu istiqamətdə işlərin məhsuldarlığının artırılması Özbəkistanla Azərbaycan arasında hökumətlərarası birgə komissiyanın fəaliyyətinə yardım edir. Komissiyanın cəmi 9 iclası keçirilib. Onlardan sonuncusu 2010-cu il sentyabrın 23-də Daşkənddə baş tutub", - o deyib.
Fayziyevin fikrincə, tərəflər istifadə edilməli olan böyük potensiala malikdirlər.
Bu istiqamətdə hər iki ölkədə ticarət evlərinin, birgə müəssisə və şirkətlərin yaradılması, satılan malların çeşidlərinin genişləndirilməsi mühüm ola bilər. Diplomatın sözlərinə görə, özbək tərəfi bununla əlaqədar Azərbaycanın işgüzar dairələrinin nümayəndələrini birbaşa tərəfdaşlıq münasibətlərinin qurulması üçün öz ölkəsinə dəvət edir.
"Fikrimcə, nəqliyyat və nəqliyyat kommunikasiyaları sahəsində qarşılıqlı səmərəli əməkdaşlığın gələcək inkişafı, eləcə də ərazilərimizin nəhəng tranzit potensialından istifadənin genişləndirilməsi perspektivli istiqamət ola bilər", - Fayziyev deyib.
O, əlavə edib ki, bu gün Mərkəzi Asiyadan Xəzər dənizi vasitəsilə və daha sonra Qafqaz vasitəsilə Qara və Aralıq dənizlərinə ixrac marşrutları xüsusi aktuallıq kəsb edir. Bu mənada Özbəkistanın bu marşrut üzrə Cənubi və Mərkəzi Avropanın bazarlarına çıxış imkanı olan yeni Bakı-Tbilisi-Qars perspektivli nəqliyyat dəhlizini inkişaf etdirməyə imkan verən mühüm nəqliyyat qovşağı kimi Bakı limanından istifadəyə marağı artır.
"Hesab edirəm ki, Azərbaycan da iqtisadi və strateji xarakterli nəhəng imkanlara malik Özbəkistanın potensialından istifadə etməkdə maraqlıdır", - Fayziyev qeyd edib.
Səfirin sözlərinə görə, 2008-ci ildən fəaliyyət göstərən "Nəvai" azad iqtisadi zonasının investisiya potensialı da iki ölkənin həmçinin nəqliyyat-kommunikasiya sahəsində əməkdaşlığının genişləndirilməsi üçün yaxşı bünövrə ola bilər.
Diplomat qeyd edib ki, avtomobil, dəmiryol və aviasiya yollarının mühüm kəsişməsində yerləşən Nəvai şəhəri Cənub-Şərqi Asiyanı Mərkəzi və Cənubi Asiya və Yaxın Şərqlə, eləcə də Avropa dövlətləri ilə birləşdirir.
O hesab edir ki, burada yeni istehsalat obyektlərinin birgə tikintisi, eləcə də qitələrarası aviadaşımaların həyata keçirilməsi perspektivdə Özbəkistan və Azərbaycan üçün xüsusilə sərfəli ola bilər.
Özbəkistanda biznesin idarə edilməsi
Özbəkistanda müstəqillik illəri ərzində əlverişli investisiya mühiti yaradılıb, qanunvericiliklə xarici investorların hüquqlarının və maraqlarının müdafiəsi üzrə güzəştlərin, imtiyazların və zəmanətlərin geniş sistemi qurulub.
Diplomatın sözlərinə görə, nəticədə respublikada iqtisadiyyatın aparıcı sahələrində 4,2 mindən artıq xarici kapitallı müəssisə yaradılıb və uğurla fəaliyyət göstərir, hər il 3 milyarddan artıq xarici investisiya mənimsənilir. Ölkə iqtisadiyyatına qoyulan investisiyaların ümumi həcminin 26,6 faizi əsasən onların payına düşür.
Səfir Özbəkistanın investisiya siyasətinin azərbaycanlı investorları maraqlandıracağına ümid etdiyini bildirib. Onun fikrincə, həmin kapital qoyuluşları iqtisadi sahədə qarşılıqlı fəaliyyətin gələcəkdə genişləndirilməsinə kömək edə bilər.
Azərbaycan ilə Özbəkistan arasında normativ-hüquqi bazanın genişləndirilməsi
Fayziyev bildirib ki, Azərbaycan ilə Özbəkistan arasında çoxplanlı əməkdaşlıq 100-dən çox müqavilə və sazişdən ibarət sanballı hüquqi bazaya əsaslanır.
"Həmçinin, demək istərdim ki, ölkələrin illərlə əməkdaşlıq edə biləcəyi yeni istiqamətlər meydana gəlir. Bu vəziyyət yeni müqavilələrin bağlanması və ya artıq mövcud olan normativ-hüquqi xarakterli sənədlərə əlavələr edilməsi üçün bazis rolunu oynayır", - o deyib.
Səfir hesab edir ki, Azərbaycan və Özbəkistan siyasi, iqtisadi və mədəni-humanitar istiqamətlər daxil olmaqla, bütün aspektlər üzrə qarşılıqlı fəaliyyətin gələcəkdə genişləndirilməsində son dərəcə maraqlıdırlar.
"Bu, öz növbəsində, onu deməyə əsas verir ki, normativ-hüquqi bazanın təkmilləşdirilməsi daim ölkələrimizin diqqət mərkəzində olacaq", - səfir deyib.
