Azərbaycan, Bakı, 5 sentyabr/ Trend, müxbirlər E. Tariverdiyeva, A. Tağıyeva/
Suriya rejiminə qarşı fəaliyyətsizlik böhranı dərinləşdirəcək, regional təhlükəsizlik və Suriya xalqının təhlükəsizliyi üçün böyük risk yaradacaq. Bu barədə cümə axşamı Trend-ə ABŞ Dövlət Departamentinin regional nümayəndəsi Coşua Beyker deyib.
"ABŞ hesab edir ki, lider Bəşşar Əsədin rejimi və onun öz xalqına qarşı cinayətkarlığı region və qonşu ölkələrdə qeyri-sabitlik yaradıb. Suriya məsələsi vacib və olduqca sadədir. Suriyada fəaliyyətsizlik riski fəaliyyət riskindən daha böyükdür".
Dövlət Departamentinin nümayəndəsinin szölərinə görə, ABŞ əmindir ki, Suriya Prezidenti Bəşşar Əsəd susqunluğu öz silahından qanunsuz istifadə edə biləcəyinə siqnal kimi hesab edəcək.
Onun sözlərinə görə, belə cəzasızlıq nüvə silahı daxil olmaqla gələcəkdə kütləvi qırğın silahlarının istifadəsi üçün presedent yaradır.
Beyker deyib: "ABŞ bu ölkənin daxilində suriyalılara humanitar yardım etməklə və ya qaçqınlar üçün öz sərhədlərini açmaqla suriyalılara dəstək verən Səudiyyə Ərəbistanı, Türkiyə, həmçinin digər qonşu ölkələrin səylərini yüksək qiymətləndirir".
O bildirib: "Biz həmin ölkələrin ABŞ-ın Suriya rejiminin insan haqlarını pozmasını, qətllər törətməsini pisləməsi mövqeyini dəstəkləmələrini yüksək qiymətləndiririk. Biz Suriya xalqının əzablarına son qoymaq, bu xalqın irəliyə baxmağa başlaması və yeni Suriyanın gələcəyini qurmaq üçün region ölkələri və beynəlxalq ictimaiyyətin bir çox üzvlərilə işləyirik".