Azərbaycan, Bakı, 10 sentyabr /Trend/
Suriya Rusiyanın təşəbbüsünü qəbul edir və kimyəvi silahdan tam imtina etməyə və həmin silahın qadağan olunması haqqında beynəlxalq konvensiyaya qoşulmağa hazırdır. Trend-in RİA Novosti-yə istinadən verdiyi məlumata görə, bunu Suriyanın xarici işlər naziri Vəlid əl-Müəllim deyib.
Nazir "əl-Məyadin" telekanalına müsahibəsində bildirib: "Rusiyanın təşəbbüsünə uyğun olaraq, Suriya kimyəvi silahın tətbiqindən tam imtina edəcək".
Əl-Müəllimin sözlərinə görə, bundan başqa, Dəməşq öz ərazisində kimyəvi silah obyektlərinin yerini göstərməyə və onun istehsalını tam dayandırmağa razıdır:
"Biz kimyəvi silah istehsalı obyektlərini Rusiya, digər ölkələr və "BMT-nin nümayəndələrinə göstərməyə hazırıq".
Qeyd edək ki, bazar ertəsi Rusiya Suriyaya kimyəvi silahı beynəlxalq nəzarət altında verməyi təklif edib. Suriya hakimiyyəti bu təklifi dəstəkləyir, müxalifət isə bu təşəbbüsü qəbul etmir.