...

İran rəsmisi: Böyük güclərin səhvi regionda sabitsizlik yaradıb

Siyasət Materials 30 Oktyabr 2014 14:35 (UTC +04:00)
İranın Xarici əlaqələr üzrə Strateji Şurasının sədri Kamal Xərrazi BMT baş katibinin birinci müavini Yan Eliasson ilə görüşüb.
İran rəsmisi: Böyük güclərin səhvi regionda sabitsizlik yaradıb

Azərbaycan, Bakı, 30 oktyabr /Trend, müxbir Təmkin Cəfərov/

İranın Xarici əlaqələr üzrə Strateji Şurasının sədri Kamal Xərrazi BMT baş katibinin birinci müavini Yan Eliasson ilə görüşüb.

Trend-in İRNA agentliyinə istinadən verdiyi məlumata görə, K.Xərrazi görüşdən sonra Y.Eliasson ilə keçirdiyi birgə mətbuat konfransında deyib ki, görüşdə böyük güclərin səhvləri və onların nəticəsində regionda qeyri-sabitliyin yaranması, eləcə də İranın nəzər nöqtəsindən problemlərin həlli yollarını müzakirə etdik.

K.Xərrazi BMT nümayəndəsi ilə keçirilən görüşü müsbət qiymətləndirib və deyib ki, görüşdə regionda baş verən proseslər, İraq, Suriya, Livandakı vəziyyət, həmçinin BMT-nin dünya ictimaiyyətinin tələblərinə cavab verməsi kimi məsələlər də müzakirə olunub.

Mətbuat konfransında çıxış edən Y.Eliasson regionda baş verən problemlərin həlli üçün çalışmağın zəruriliyindən danışıb və bildirib ki, problemlərin həll yolu hərbi müdaxilələr deyil, siyasi danışıqlar olmalıdır. "Heç şübhəsiz İraq və Suriyadakı proseslərin həlli hərbi yola deyil, siyasi yollarla olmalıdır".

O, İranın regionda təsiredici ölkə olduğunu vurğulayıb.

BMT baş katibinin birinci müavini Yan Eliasson oktyabrın 28-dən Tehranda səfərdədir. Səfər zamanı Y.Eliasson BMT-nin yaranmasının ildönümü münasibətilə Tehranda keçirilən mərasimlərdə iştirakı ilə yanaşı, İranın XİN rəhbəri Məhəmməd Cavad Zərif, bu ölkənin Ali Liderinin beynəlxalq əlaqələr üzrə müşaviri Əli Əkbər Vilayəti və digər rəsmilərlə də görüşüb.

Qeyd edək ki, İranın Xarici əlaqələr üzrə Strateji Şurası 2006-cı ildə ali lider Ayətullah Xameneinin göstərişi ilə yaradılıb. Bu şuranın əsas vəzifəsi İslam Respublikasının xarici əlaqələrində strategiyaların və siyasətin müəyyənləşdirilməsidir.

Məqalədə:
Xəbər lenti

Xəbər lenti