...

Azərbaycanla Aydaho ştatı arasında əməkdaşlıq imkanları müzakirə edilib (FOTO)

Siyasət Materials 26 Noyabr 2015 10:26 (UTC +04:00)
Azərbaycanın Los Ancelesdəki baş konsulu ABŞ-ın Aydaho Ştatının qubernatoru ilə görüşüb.
Azərbaycanla Aydaho ştatı arasında əməkdaşlıq imkanları müzakirə edilib (FOTO)

Trend-i buradan izləyin

Bakı. Trend:

Azərbaycanın Los Ancelesdəki baş konsulu ABŞ-ın Aydaho Ştatının qubernatoru ilə görüşüb. Bu barədə konsulluqdan Trend-ə verilən məlumatda bildirilir.

Məlumatda qeyd olunur ki, Azərbaycanın Los Ancelesdəki baş konsulu Nəsimi Ağayev ABŞ-ın Aydaho Ştatının qubernatoru C.L."Batç" Otterin rəsmi dəvəti ilə 2015-ci ilin 22-24 noyabr tarixlərində sözügedən ştatda səfərdə olub.

Səfər müddətində baş konsul ştat qubernatoru Otter ilə görüş keçirərək, qarşılıqlı maraq doğuran məsələlər ətrafında fikir mübadiləsi aparıb.

Görüş zamanı Azərbaycan ilə Aydaho ştatı arasında müxtəlif sahələrdə, xüsusilə kənd təsərrüfatı, turizm, informasiya texnologiyaları, təhsil və mədəniyyət üzrə əməkdaşlıq imkanları müzakirə edilib.

Müstəqilliyinin bərpasından sonra Azərbaycanın keçdiyi inkişaf yolu barədə qubernatora məlumat verən baş konsul N.Ağayev, Aydaho Ştatı ilə Azərbaycanın münasibətlərinin inkişafı üçün böyük potensialın olduğunu qeyd edib.

Diplomat, həmçinin, Azərbaycanın qədim tolerantlıq və multikulturalizm ənənələri barədə söz açaraq, bu gün ölkəmizdə müxtəlif dinlərin və millətlərin sülh və əmin-amanlıq şəraitində yaşadıqlarını diqqətə çatdırıb. Baş konsul, son dövrlərdə dünyanın müxtəlif yerlərində artan dini-etnik dözümsüzlük və zorakılıqlar fonunda Azərbaycanın uğurlu tolerantlıq modeli nümayiş etdirdiyini və artıq özünü kifayət qədər təsdiq etmiş bu modelin beynəlxalq ictimaiyyət tərəfindən böyük rəğbətlə qarşılandığını vurğulayıb.

Öz növbəsində, qubernator Otter keçirilən görüşdən məmnunluq duyduğunu ifadə edərək, Azərbaycan ilə əməkdaşlığın inkişaf etdirilməsində Aydaho ştatının maraqlı olduğunu bildirib.

Qeyd edək ki, səfər müddətində baş konsul N.Ağayev Aydaho Ştatının digər rəsmiləri, həmçinin, yerli icma nümayəndələri və müxtəlif media təmsilçilərilə görüşlər keçirib.

Məqalədə:
Xəbər lenti

Xəbər lenti