Pakistan Ermənistan qoşunlarının Azərbaycanın dinc sakinlərinə hücumunu pisləyir
Bakı. Elmira Tariverdiyeva - Trend:
Pakistan Ermənistan qoşunlarının Azərbaycanın dinc sakinlərinə hücumunu pisləyir.
Trend-in məlumatına görə, bu barədə Pakistan Xarici İşlər Nazirliyinin bəyanatında deyilir.
Bəyanatda bildirilir: “Biz bu vəziyyətdə Azərbaycan xalqının əhval-ruhiyyəsini anlayırıq, çünki bu cür hadisələr demək olar ki, hər gün baş verir”.
Qeyd olunur ki, Pakistan Kəşmir ətrafındakı vəziyyətlə bağlı eyni hissləri keçirir.
Xatırladaq ki, iyulun 4-də axşam saatlarında erməni silahlı birləşmələri Füzuli rayonunun Alxanlı kəndini minaatanlardan atəşə tutub. Təxribat nəticəsində Alxanlı kənd sakinləri - 1966-cı il təvəllüdlü Quliyeva Sahibə İdris qızı və onun nəvəsi 2016-cı il təvəllüdlü Quliyeva Zəhra Elnur qızı həlak olub, 1965-ci il təvəllüdlü Quliyeva Sərvinaz İltifat qızı isə ağır yaralanıb.
