Bakı. Trend:
2016-cı ildə Azərbaycan-Amerika münasibətlərinin inkişafının işıqlandırılmasına verdiyi töhfəyə görə ABŞ Konqresinin Nümayəndələr Palatası tərəfindən Amerika bayrağı ilə təltif edilmiş “Region Plus” analitik jurnalı ABŞ qanunvericilərini Ermənistan-Azərbaycan münaqişəsində tərəflərin mövqeləri arasında balansın qorunması məsələsinin əhəmiyyətinə diqqət yetirməyə çağırıb.
Trend xəbər verir ki, çağırış ABŞ Konqresinin Nümayəndələr Palatasının sədri Nensi Pelosinin 17-18 sentyabr 2022-ci il tarixlərində Ermənistana səfəri və bir sıra anti-Azərbaycan bəyanatları ilə çıxış etməsi fonunda olub. Bundan əlavə, bu yaxınlarda konqresmen Ceki Speyerin rəsmi saytında (həmçinin konqresmenlər Frank Pallone, Adam Şiff və Anna Eşhu tərəfindən imzalanmış) qətnamə təqdim edilib ki, orada da yenə də Azərbaycan tərəfi mənfi şəkildə təqdim olunur və hətta obyektiv balanslaşdırılmış yanaşmanı müşahidə etmək cəhdi belə yoxdur.
ABŞ Konqresinin Nümayəndələr Palatası konqresmen Qven Murun təklifi ilə Azərbaycanın “Region Plus” jurnalını mükafatlandırıb. “Region Plus” jurnalının 10 illiyi şərəfinə nəşrə təqdim olunan “Ulduzlar və Zolaqlar” bayrağı Kapitolinin binası üzərində dalğalanıb. Bu barədə Kapitolinin memarı Stiven T. Ayers tərəfindən imzalanmış xatirə sertifikatında deyilir. ABŞ Bayraq Mükafatı Konqres tərəfindən bütün dünyada tanınmış şəxslərə, QHT-lərə və mediaya verilir. “Region Plus” jurnalı Azərbaycanda bu mükafatı alan ilk təşkilat oldu.
Aşağıda "Region Plus" jurnalı adından ABŞ konqresmenlərinə göndərilmiş məktub təqdim edilib. Məktub həmçinin hazırda ABŞ Nümayəndələr Palatasında Respublikaçılar Partiyasının lideri olan konqresmen Kevin Makkartiyə də göndərilib.
Məktubun mətni:
"Birləşmiş Ştatlar Azərbaycan-Ermənistan münaqişəsinə
münasibətində həmişə balanslaşdırılmış yanaşmaya riayət etməyə
çalışıb. Ən azı Amerikanın yüksək rütbəli siyasətçilərinin regiona
bütün səfərləri münaqişə ilə bağlı balanslaşdırılmış mövqe
çərçivəsində həyata keçirilib. Üstəlik, Birləşmiş Ştatlar BMT
Təhlükəsizlik Şurasının üzvü kimi BMT Təhlükəsizlik Şurasının bütün
dörd qətnaməsinə (822, 853, 874 və 884, 30 aprel - 12 noyabr
1993-cü il tarixləri) səs verib və bu qətnamələrə əsasən Ermənistan
silahlı qüvvələri Azərbaycan ərazisini dərhal tərk etməli idi.
Təəssüf ki, ABŞ Konqresinin Nümayəndələr Palatasının sədri Nensi
Pelosinin 2022-ci il sentyabrın 17-18-də Ermənistana rəsmi səfəri
ilk dəfə olaraq İrəvana açıq meyl göstərdi.
2016-cı ildə Azərbaycan-Amerika münasibətlərinin inkişafının
işıqlandırılmasına verdiyi töhfəyə görə ABŞ Konqresinin
Nümayəndələr Palatası tərəfindən Amerika bayrağı ilə təltif edilmiş
“Region Plus” jurnalının kollektivi xanım Pelosinin ABŞ
Konqresindəki həmkarlarını münaqişə tərəflərinin mövqeləri arasında
balansın saxlanmasının vacibliyinə diqqət yetirməyə çağırır. ABŞ-da
noyabrda keçiriləcək aralıq seçkiləri fonunda xanım Pelosinin
İrəvana səfərinin məqsədi tam aydındır - Konqresdə spiker çoxlu
sayda etnik ermənilərin yaşadığı Kaliforniya ştatını təmsil edir.
Bununla belə, hesab edirik ki, xanım Pelosi İrəvana səfəri zamanı
Azərbaycan-Ermənistan münaqişəsinə bu cür birtərəfli yanaşmadan
çəkinməyə çalışmalı idi. Üstəlik, yuxarıda qeyd etdiyimiz kimi, BMT
Təhlükəsizlik Şurasının qətnamələrinə baxmayaraq, xanım Pelosi heç
vaxt Ermənistandan onların icrasını tələb etməyib, indi isə
birdən-birə Ermənistana dəstək vermək üçün kəskin çıxış etmək
qərarına gəlib.
Onu da xatırlatmaq istəyirik ki, 30 ilə yaxın erməni işğalı
dövründə müasir Livanın ərazisinə bərabər ərazidə yerləşən
Azərbaycan şəhər və kəndləri sözün əsl mənasında yer üzündən
silinib. Söhbət ümumi sahəsi 10 min kvadrat kilometrdən çox olan
300-dən çox yaşayış məntəqəsindən gedir. Azərbaycanın tarix və
mədəniyyət abidələrinin 95 faizi, o cümlədən 67 məsciddən 63-ü,
qəbiristanlıqlar, bir çox muzeylər, o cümlədən Ağdam şəhərindəki
nadir Çörək Muzeyi, Qarabağ xanlarının məqbərəsi, Qarabağ
xanlarının qızı Xurşudbanu Natəvanın evi dağıdıldı. Həmin yerə baş
çəkən ispaniyalı jurnalist Ağdam şəhərini “Qafqazın Xirosiması”
adlandırıb...
Birinci Qarabağ Müharibəsi nəticəsində 1994-cü ilin may ayına kimi
Azərbaycanda on minlərlə insan həlak olub, yaralanıb və ya girov
götürülüb. Bütün dinc Azərbaycan əhalisi, təxminən 750 min nəfər
ermənilər tərəfindən işğal olunmuş torpaqlardan öz yurd-yuvasından
didərgin salınmışdır. Bu etnik təmizləmələrin ən dəhşətli epizodu
1992-ci il fevralın 25-dən 26-na keçən gecə Xocalı soyqırımı olub,
613 nəfər həlak olub. 2020-ci ilin sentyabr ayına bir milyondan çox
insan qaçqın statusunda olub. Həmçinin işğal olunmuş ərazilərdə
ekologiyaya böyük ziyan dəymişdir - çirklənmiş çaylar (Oxçuçay),
qırılmış meşələr, tapdalanmış otlaqlar...
Biz inanmırıq ki, bunlar hansısa siyasi hesablama xatirinə göz ardı
edilə biləcək faktlardır.
Aşağıdakı VMedia Youtube kanalının videosunda xanım Pelosinin
İrəvana son səfərindən kənarda qaldığı Ermənistanın işğalı
illərində Azərbaycan tərəfinə dəymiş zərərin miqyası
göstərilir.