Bakı. Trend:
Təəssüf ki, Ermənistanın əsir, girov götürülmüş, itkin düşmüş
şəxslərlə bağlı addımları beynəlxalq ictimaiyyət tərəfindən
pislənilmir, onlara qarşı hər hansısa addımlar atılmayıb.
Trend-in məlumatına görə, bunu Prezident Administrasiyasının Xarici
siyasət məsələləri şöbəsinin sektor müdiri Həbib Mikayıllı bu gün
Azərbaycanda itkin düşmüş şəxslər probleminə həsr olunmuş brifinqdə
deyib.
O qeyd edib ki, Qriqoryan adlı general vardı ki, o açıq şəkildə
etiraf edib ki, evində azərbaycanlı əsiri bir ilə yaxın kölə kimi
saxlayıb.
“Amma, dediyimiz kimi, bunların heç biri qınanılmır.
Ermənistanda kütləvi məzarlıqların yerləri var, lakin Ermənistan bu
istiqamətdə əməkdaşlıq etməkdən imtina edir", - deyə Həbib
Mikayıllı bildirib.