Bakı. Trend:
Bu parlament seçkiləri Azərbaycanın daha da çiçəklənməsinə töhfə verəcək.
Trend xəbər verir ki, bu barədə Pakistan Milli Assambleyasının üzvü Zulfikar Ali Bhutto jurnalistlərə bildirib.
"Pakistan Milli Assambleyasının üzvləri olaraq 1 sentyabr 2024-cü il tarixində Azərbaycanda parlament seçkilərinin müşahidəsində iştirak etmək bizim üçün böyük şərəf oldu. Missiyamızın təməlində Pakistan ilə Azərbaycan arasında möhkəm qardaşlıq əlaqələri dayanır və biz bu vəzifəyə hörmət hissi ilə yanaşırıq. Biz əminik ki, azad, ədalətli və şəffaf seçkilər istənilən demokratik sistemin sağlamlığı üçün vacibdir. Biz Azərbaycan xalqını bu ideallara can atmaqda dəstəkləmək üçün buradayıq", - o bildirib.
Onun sözlərinə görə, Pakistan və Azərbaycan arasında uzunmüddətli münasibətlər qarşılıqlı dəstək və həmrəyliklə xarakterizə olunur.
"Əminik ki, bu seçkilər Azərbaycanın demokratik əsaslarının möhkəmləndirilməsində daha bir addım olacaq və ölkənin daha da çiçəklənməsinə töhfə verəcək", – o əlavə edib.
Qeyd edək ki, sentyabrın 1-də Azərbaycanda növbədənkənar parlament seçkiləri keçirilib. Seçkiləri müşahidə etmək üçün 112 min 749 yerli müşahidəçi qeydə alınıb. Onlardan 65 mindən çoxu siyasi partiyaların nümayəndələridir. Qeydə alınmış beynəlxalq müşahidəçilərin sayı 598 nəfər olub ki, onlar 51 Təşkilatı, 69 ölkəni təmsil edib. Parlament seçkilərində qeydə alınan 990 namizəddən 305-i 25 siyasi partiyanın nümayəndəsidir. 371 nəfər siyasi partiyaların üzvü olmasına baxmayaraq, partiyalar tərəfindən namizəd olaraq irəli sürülməyiblər. Ümumilikdə 676 namizədin siyasi partiya mənsubiyyəti var.
