Azərbaycan Respublikası Nəqliyyat Nazirliyi, "Yolnəqliyyatservis" Departamenti və İran İslam Respublikasının "PASSİLLO" şirkətinin məsləhətçi-mühəndisləri cənub regionunun icra strukturlarının nümayəndələri ilə birlikdə Lənkəranda seminar keçirib. Lənkəran İcra Hakimiyyətindən Trend ə verilən məlumata görə, seminarda Bakı-Astara yolunun 243 km-ni tutan Ələt-Astara yolunun bərpası və tikintisi layihəsinin reallaşdırılması ilə bağlı məsələlər, həmçinin Astara çayı üzərində inşa edilən yeni avtomobil körpüsünün texniki-iqtisadi layihəsinin hazırlanması və əsaslandırılması ilə bağlı məsələlər müzakirə olunub. Seminar "Layihənin reallaşdırılmasının ətraf mühitə təsirinin qiymətləndirilməsi" mövzusunda keçirilib.
Nəqliyyat Nazirliyinin "Yolnəqliyyatservis" Departamentinin texniki şöbə rəisi, İranın "PASSİLO" məsləhətçilər-mühəndislər şirkətinin nümayəndəsi İsmayıl Nuri və Cavanşir Həsən dinləyicilərə layihənin həyata keçirilməsi barədə hərtərəfli məlumat verib. Müzakirələr zamanı Cəlilabad, Masallı, Lənkəran, Astara rayonlarının icra strukturlarının nümayəndələri çıxış ediblər.
Layihəyə görə, Ələt-Astara avtomobil yolunun uzunluğu 243 km-dir, bu isə Bakı və Astara arasında yolu 70 km qısaltmağa imkan verəcək. Yolun eni 28,2 m-dir.
